غلامﷲ ۾ پوليو ورڪرن پاران ريلي ڪڍي احتجاج ڪيو ويو
يوسي غلام الله ۽ سمڪي کي پوليو ويڪسين ۽ بوسٽرڊوز پروگرام ۾ شامل نه ڪرڻ خلاف احتجاج ڪيو ويو
ٺٽو( شفيق ڀٽي) يوسي غلام الله ۽ سمڪي کي پوليو ويڪسين توڙي بوسٽر ڊوز پروگرام ۾ شامل نه ڪرڻ خلاف پوليو ورڪرز سراپا احتجاج بڻجي ويون، جن پاران ھڪ احتجاجي مظاھرو شرميلا، مصري ڪاتيار، الھڏنو بلوچ، بيدل رند، عمر ڪاتيار ۽ ٻين جي اڳواڻي ۾ ھٿن ۾ پلي ڪارڊ کڻي بيسڪ هيلٿ سينٽر غلام الله کان پوليس چوڪي غلام الله تائين ڪڍي سخت نعريبازي ڪندي چيو تہ يوسي غلام الله ۽ سمڪي ۾ لڳ ڀڳ 15 هزار کان وڌيڪ ٻار پوليو پروگرام ۾ رجسٽرڊ آهن، پر ان باوجود ٻنهي يوسيز کي پوليو ويڪسين ۽ بوسٽر ڊوز جي مرحلي مان نظرانداز ڪيو ويو آهي، جيڪو ٻارڙن جي صحت سان وڏي ناانصافي آهي. ھنن چيو تہ پوليو ورڪرز هر ڏکئي وقت ۾ پنهنجي جان خطري ۾ وجهي ڳوٺن ۾ وڃي گهر گهر پهچي معصوم ٻارڙن کي پوليو کان بچاءَ جا ڦڙا پيارين ٿا. هنن چيو ته گهٽ معاوضي ۽ ڪيترن ئي مسئلن باوجود هو قومي ذميواري نڀائي رهيا آهن، پر انتظاميا ۽ ڊبليو ايڇ او طرفان يوسي غلام الله ۽ سمڪي کي نظرانداز ڪرڻ سان ورڪرن ۾ سخت بيچيني پيدا ٿي آهي. ھنن مطالبو ڪيو ته يوسي غلام الله ۽ سمڪي کي فوري طور پوليو ويڪسين ۽ بوسٽر ڊوز پروگرام ۾ شامل ڪيو وڃي، جيئن هزارين ٻارڙن کي حفاظتي سهولتون ملڻ سان گڏ ورڪرن ۾ پيدا ٿيل بيچيني ختم ٿي سگهي.
0 تبصرے