ڪئنال منصوبو سنڌو درياھ ۽ زرعي معيشت تي خوني حملو آھي: اياز لطيف پليجو

سنڌ کي ٽڪرا ٽڪرا ڪري وڪرو ڪيو پيو وڃي، ڌرتي ڌڻين جي پيرن هيٺيان زمين ڪڍڻ وارو عمل برداشت نہ ڪيو ويندو

حيدرآباد(بيورو) قومي عوامي تحريڪ جي سربراھ اياز لطيف پليجي عمر ڪوٽ ضلعي جي 14 ھزار ايڪڙ زمين مختلف ڪمپنين کي ڏيڻ جي مذمت ڪندي چيو تہ ڌرتي ڌڻين جي پيرن هيٺيان زمين ڪڍڻ وارو عمل برداشت نہ ڪيو ويندو. سنڌ کي ٽڪرا ٽڪرا ڪري وڪرو ڪيو پيو وڃي.ڪئنال منصوبو سنڌو درياھ ۽ زرعي معيشت تي خوني حملو آھي. جمھوريت جو نعرو پيپلز پارٽي جا ھاٿي وارا ڏيکارڻ وارا ڏند آھن. زرداري ٽولو اقتدار لاءِ سنڌ جا وسيلا ۽ زمينون کپائي رھيو آھي. اياز لطيف پليجي چيو ته سنڌ کي لٽڻ لاءِ پيپلز پارٽي کي 17 سالن کان مسلط ڪيو ويو آھي. اليڪشن نظام يرغمال آھي. ڪٺ پتلي حڪمران مڙھي من پسند فيصلا ورتا وڃن ٿا. اياز لطيف پليجي چيو تہ سنڌ کي ديوار سان لڳايو پيو وڃي. ھڪ طرف پاڪستان عالمي طاقتن جي گھيري ۾ آھي ٻئي طرف ڪرپٽ حڪمران بلوچستان ۽ سنڌ جا وسيلا لٽي رھيا آھن. سنڌ جو عوام رستن تي آھي. جدوجھد جي باھ جا شعلا بلند ٿيندا ته ڪرپٽ حڪمران ھلي نہ سگھندا. اياز لطيف پليجي چيو تہ سنڌ جي وسيلن ۽ زمينن جي نيلامي بند ڪئي وڃي. ميگا پروجيڪٽ جي نالي ۾ سنڌ جي لکين ايڪڙ زمين مختلف ادارن ۽ وفاق جي حوالي ڪرڻ قبول ناهي. پيپلز پارٽي ٻيھر اقتدار لاءِ سنڌ جون زمينون ۽ وسيلا وفاق حوالي ڪري تين وال ڪيا. سڄي سنڌ ۾ بي زمين ھاري خاندانن ۾ گھٽ ۾ گھٽ 30 ايڪڙ في خاندان ۾ زمين مفت ورھائي ڏني وڃي تہ جيئن لکين خاندان پنھنجي پيرن تي بيھي سگھن. اياز لطيف پليجي چيو تہ پيپلز پارٽي ۽ سنڌ حڪومت کي اھڙو ڪو اختيار ناھي جو سنڌو درياھ، سنڌ جون زمينون ۽ وسيلا وڪڻي. مختلف منصوبن جي نالن ۾ سنڌ جي لکين ايڪڙ زمين وفاق حوالي ڪري سنڌي ماڻهن کي پنهنجي ڌرتي تان بي دخل ڪرڻ سنڌ ۽ سنڌي ماڻهن سان سان ناانصافي آهي سنڌ جو عوام ڪئنال، وسيلن ۽ زمينن قبضن خلاف جدوجھد ۾ شامل ٿئي.