ٺٽو شهر بدامني جي باهه ۾ ٻري رهيو آهي، پوليس ڏوهارين خلاف ڪارروائي نٿي ڪري: ممتاز شيخ

چوريون، ڦرون ۽ ڌاڙا وڌڻ سبب رهواسي خوف واري زندگي گذاري رهيا آهن، نوٽيس وٺي امن بحال ڪرايو وڃي: قيو اي ٽي اڳواڻ

ٺٽو(محمد شفيق ڀٽي) ٺٽي شھر جي ڊاڪٽر گلي ۽ شاھ ڪمال محلي جي رھواسين قومي عوامي تحريڪ جي اڳواڻ ممتاز شيخ، وحيد سومرو،غلام قادر تارو ۽ ٻين عوامي پريس ڪلب تي پريس ڪانفرنس ڪندي چيو آھي تہ ٺٽي شھر ۾ وڌندڙ ڏوھي وارداتن عوام جو جيئڻ جنجال بڻائي ڇڏيو آھي، ھڪ ھفتي اندر 10 کان وڌيڪ وارداتون ٿي چڪيون آھن پر پوليس ڪوبہ تحرڪ نہ ورتو آھي. ھنن چيو تہ ٺٽي شھر ۾ ڏوھي وارداتن ۾ تيزي سان اضافو اچي رھيو آھي، جنھن جي ڪري رھواسين جو ڦرجڻ روز جو معمول بڻجي ويو آھي. ٺٽي شھر جي ڊاڪٽر گلي واري علائقي مان گذريل ھڪ ھفتي اندر شھرين جي گھرن ۽ دڪانن مان 10 کان وڌيڪ چوري جون وارداتون ٿيون آھن، ڦريل شھرين پاران ٺٽي ٿاڻي تي رپورٽون پڻ داخل ڪرايون ويون آھن پر ٺٽو پوليس ھڪ بہ چوري واپس ڪرائڻ ۾ مڪمل طور تي ناڪام ٿي وئي آھي. ھنن موجب ڊاڪٽر گلي جي شاھ ڪمال واري علائقي مان قومي عوامي تحريڪ ضلعي ٺٽي جي صدر ممتاز شيخ جي گھران 2 ڀيرا، غلام قادر تارو جي گھران 2 ڀيرا، وحيد سومرو جي دڪان ۽ گھر مان چوري، غلام حسين ڪنڀر جي گھر مان چوري جون وارداتون ٿيون آھن، چور گھرن مان الھ تلھ ٻھاري ويا آھن. ھنن وڌيڪ چيو تہ ٺٽي شھر ۾ بدامني جي وڌڻ جو سبب منشيات جو عام ٿيڻ آھي، ٺٽي ۾ منشيات کلي عام ھلڻ سبب نوجوان تيزي سان منشيات جا عادي بڻجي ويا آھن، پوليس صرف منشيات جي اڏن تان منٿلي وٺڻ ۾ مصروف آھي، ڊاڪٽر گلي مان ٿيل چوري جي وارداتن بابت حد جي ٿاڻي تي رپورٽون داخل ڪرايون آھن پر پوليس ڪابہ ڪاروائي ڪرڻ لاءِ تيار ناھي. ھنن آءِ جي سنڌ کان مطالبو ڪيو تہ نوٽيس وٺي چوري ٿيل سامان واپس ڪرائي شھرين کي تحفظ فراھم ڪيو وڃي.