شڪارپور ۾ پئٽروليم شين جي اگهن ۾ واڌ خلاف ريلي

شڪارپو (احسان ابڙو)ھاري جدوجھد ڪميٽي شڪارپور پاران پيٽرول ۽ ڊيزل جي اگهن ۾ تازي واڌ خلاف علي کوسو، منظور کوسو، غمٺار دل، غلام نبي بروهي، ناز نصرالله مھر ۽ ٻين اڳواڻن جي قيادت ۾ سکر–لاڙڪاڻو روڊ، نئي پل بس اسٽاپ تي هڪ پرامن احتجاجي مظاهرو ڪيو ويو. مظاهري ۾ ھارين، مزدورن، شاگردن، سماجي ڪارڪنن ۽ مختلف شعبن سان تعلق رکندڙ ماڻهن وڏي انگ ۾ شرڪت ڪئي، جيڪي پيٽروليم شين جي وڌندڙ قيمتن جي ڪري روزمره جي زندگي ۾ پيدا ٿيندڙ مشڪلاتن خلاف آواز بلند ڪرڻ لاءِ گڏ ٿيا هئا مظاهرين حڪومت جي پاليسين خلاف نعره بازي ڪندي مطالبو ڪيو ته پيٽرول ۽ ڊيزل جي اگهن ۾ فوري طور گهٽتائي ڪئي وڃي مظاهري دوران علي کوسو، منظور کوسو، غمٺار دل ۽ ٻين اڳواڻن خطاب ڪندي چيو: "پيٽرول ۽ ڊيزل جي وڌايل اگهن عام ماڻهو، ھارين ۽ مزدورن لاءِ ناقابل برداشت آهن. تيل جي اگھ وڌڻ سبب اسان عام ٻن ويلن جي ماني کان محروم ٿي وينداسين ۽ ملڪ جي 99 فيصد آبادي بکون ڪاٽڻ تي مجبور ٿي ويندي. حڪومت فوري طور تي پيٽرول ۽ ڊيزل جون قيمتون وڌائڻ وارو عوام دشمن فيصلو واپس وٺي، قيمتن ۾ گهٽتائي ڪري عوام جون زندگيون زهر بڻائڻ کان بچائي. ٻي صورت ۾ اسان خاموش نه ويهنداسين ۽ عوامي مطالبا نه مڃڻ جي صورت ۾ احتجاجي تحريڪ کي سڄي صوبي ۾ وڌايو ويندو. مهانگائي عوام جي زندگي ڏکي بڻائي ڇڏي آهي ۽ اسان پنهنجي آواز بلند ڪري حق طلب ڪري رهيا آهيون." اڳواڻن زور ڏنو ته پيٽروليم مصنوعات جي وڌندڙ قيمتن جو اثر ٽرانسپورٽ، زراعت ۽ روزمره جي ٻين شعبن تي پڻ پئجي رهيو آهي، جيڪو عام عوام لاءِ ناقابل برداشت آهي. ھنن خبردار ڪيو ته مطالبا نه مڃڻ جي صورت ۾ احتجاج جو دائرو وسيع ڪيو ويندو ۽ سڄي سنڌ ۾ احتجاجي تحريڪ هلائي ويندي