سنڌ سان پاڻي جي سلسلي ۾ انصاف نه پيو ڪيو وڃي، ھٿرادو پاڻي کوٽ جو نشانو بڻايو پيو وڃي: اياز لطيف پليجو
تونسا ۽ چشمه ڪئنال ذريعي زبردستي 12 مھينا پاڻي چوري ڪيو وڃي ٿو، ٿل ڪئنال ۽ ٻين ڌاڙيل منصوبن ذريعي سنڌو درياھ تي ڌاڙا ھنيا وڃن ٿا
حيدرآباد(بيورو) قومي عوامي تحريڪ جي سربراھ اياز لطيف پليجي ڪجھ سالن کان سنڌ ۾ ڏڪار ھجڻ بابت وزيراعلي سنڌ مراد علي شاھ جي بيان تي ردعمل ڏيندي چيو آھي تہ پ پ حڪومت جي نااهلي ۽ اقتدار خاطر سوديبازي جي ڪري سنڌ سان پاڻي جي سلسلي ۾ انصاف نہ پيو ڪيو وڃي. سنڌ کي ھٿرادو پاڻي کوٽ جو نشانو بنايو پيو وڃي. تونسا ۽ چشمه ڪئنال ذريعي زبردستي 12 مھينا پاڻي چوري ڪيو وڃي ٿو. ٿل ڪئنال ۽ ٻين ڌاڙيل منصوبن ذريعي سنڌو درياھ تي ڌاڙا ھنيا وڃن ٿا. جيڪو پاڻي سنڌ کي ملي ٿو اھو مخالفن خلاف ھٿيار طور استعمال ڪيو وڃي ٿو. ڪرپٽ وزير پنھنجي زمينن کي آباد ڪرڻ لاءِ غير قانوني نموني پاڻي کڻي وڃن ٿا. ملندڙ پاڻي جي منصفاڻي ورڇ نٿي ٿئي. جنھنڪري سنڌ جي آبادگارن جو معاشي قتل ٿي رھيو آھي. اياز لطيف پليجي چيو تہ سنڌ حڪومت جون پاليسيون زرعي سڌارن ۽ معاشي سڌارن واريون ناھن. سنڌ حڪومت جي پاليسين جي ڪري ھارين، آبادگارن ۽ عام ماڻھن جي زندگي سخت متاثر ٿي آھي. سنڌ جي پورھيت طبقي جي زندگي ۾ بھتري يا سڌارو اچڻ بدران بدحالي آئي آھي. اياز لطيف پليجي چيو تہ اصل مسئلو ڪرپشن ۽ خراب حڪمراني جو آھي. شفافيت نہ ھجڻ ڪري ڪو بہ منصوبو عوام کي فائدو ڏيڻ کان اڳ ۾ ختم ٿي وڃي ٿو. بيوروڪريسي جون مقرريون رشوت سان ٿين ٿيون. نوڪريون وڪرو ٿين ٿيون. ڊگريون وڪرو ٿين ٿيون. انھي صورتحال ۾ عوام کي انصاف ملڻ ڪيئن ممڪن آھي. اياز لطيف پليجي چيو تہ مهانگائي عوام جو جيئڻ جنجال ڪري ڇڏيو آھي. غربت انتھا کي پھچي وئي آھي. ھڪ طرف ملڪ سياسي ۽ معاشي بحرانن ۾ جڪڙيو پيو آھي تہ ٻئي طرف سنڌ دشمن منصوبا جوڙي سنڌ کي ديوار سان لڳايو پيو وڃي، جنھنڪري سنڌ ۾ لکين ماڻھو رستن تي احتجاج ڪري رھيا آھن.
0 تبصرے