ٺٽي ۾ ڳوٺ گلشير جوکيو واسي پورهيتن جو احتجاجي مظاهرو

ايف آءِ اي راولپنڊي پاران اسان جي ڀيڻ جي نالي نوٽيس جاري ٿيا آهن جنهن ۾ فراڊ جو الزام آهي: بخت علي جوکيو

ٺٽو(محمد شفيق ڀٽي)يونين ڪاؤنسل گل منڊا، ٺٽو جي ڳوٺ گلشير جوکيو جي رھواسي بخت علي جوکيو عوامي پريس ڪلب ٺٽو پھچي پريس ڪانفرنس ڪندي چيو ته اسان ڳوٺ جا رھواسي سادا سودا ماڻھو آھيون، ٻني ٻارو ڪري پنھنجو گذر سفر ڪندا آھيون. ھن ٻڌايو ته گذريل 7 نومبر 2024 ۽ 13 نومبر 2024 تي منھنجي ڀيڻ، جيڪا پڻ سادي سودي ڳوٺاڻي عورت آھي، ان جي نالي تي ڊپٽي ڊائريڪٽر آفيس ايف آئي اي راولپنڊي مان ٻه نوٽيس مليا آھن، جنھن ۾ چيو ويو آھي ته ڪو فنانشل فراڊ جو معاملو آھي ان ڪري نوٽيس ملڻ شرط حاضر ٿي جواب داخل ڪرايو، ٻئي صورت ۾ ايف آءِ آر داخل ڪري وڌيڪ سخت ڪارروائي ڪئي ويندي.بخت علي جوکيو جو چوڻ ھو ته اسان اڻپڙهيل ۽ اڻڄاڻ ماڻھو آھيون، منھنجي ڀيڻ ڪڏھن پنھنجي ڳوٺ کان ٻاھر به نه وئي آھي ۽ ان کي موبائل استعمال ڪرڻ به نٿو اچي، پوءِ اھا ڪيئن ھيڏا وڏا فراڊ ڪري سگھي ٿي، جنھن جو ڪيس راولپنڊيءَ ۾ داخل ٿيو آھي. ھن وڌيڪ چيو ته نوٽيس ملڻ کانپوءِ اسان جي زندگي عذاب ٿي وئي آھي ۽ خوف سبب اسان جي ننڊون حرام ٿي ويون آھن.ھنن وڌيڪ چيو تہ ڪجھ عورتون ۽ مرد ڳوٺ ۾ آيا ھئا جن چيو تہ بي نظير جي پئسن جي سروي ھلي پئي سو ڊوائيس تي عورتن کان آڱوٺا ھڻايا، لڳي ٿو تہ انھن فراڊ ڪري اسان جي عورتن جي نالي سمون ايڪٽو ڪري پو ڪرمنل ماڻھن سان وڪرو ڪيون آھن جنھن سبب اسان جي عزتدار شريف عورتن کي ڦاسايو پيو وڃي، ھنن، ڊي جي ايف آئي اي، ايس ايس پي ٺٽو، ڊي آءِ جي حيدرآباد ريجن، آءِ جي سنڌ ۽ ڊائريڪٽر ايف آءِ اي حيدرآباد ريجن سميت ٻين وس وارن کان مطالبو ڪيو آھي ته معاملي جي شفاف جانچ ڪري، اسان کي تحفظ ۽ انصاف فراھم ڪيو وڃي.۽ اسان جي عورتن کي ڪوڙي ڪيس ۾ ڦاسائڻ وارين ڪوششن کان بچايو وڃي