اسماعيل ڏاهري جي ڀيڻ پاران تحفظ لاءِ نوابشاهه جي عدالت ۾ درخواست داخل

بااثر ماڻهو پوليس سان گڏجي زمينن، گهرن، بنگلن، اوطاقن، گاڏين ۽ ڪاروبار تي قبضا ڪري رهيا آهن: حميدا ڏاهري

نوابشاهه (ڊ ر) اڳوڻي صوبائي صلاحڪار اسماعيل ڏاهري جي ڀيڻ حميدا ڏاهري نواب شاھ جي عدالت ۾ تحفظ جي درخواست داخل ڪرائي ڇڏي.ضلعي جي مختلف پريس ڪلبن تي احتجاج ڪرڻ بعد اسماعيل ڏاهري جي ڀيڻ عدالت سان رجوع ڪندي وڪيل سچل مجيب ماڇي معرفت قانوني تحفظ جي درخواست جمع ڪرائي ڇڏي. نوابشاھ جي ڊسٽرڪٽ اينڊ سيشن جج جي عدالت پاران ڊي آئي جي، ايس ايس پي شهيد بينظير آباد، ضلعي جي سمورن ڊي ايس پيز ۽ ايس ايڇ اوز کي نوٽيس جاري ڪندي ٻڌڻي 21 نومبر تي مقرر ڪري ڇڏي آهي. درخواستگذار حميدا ڏاهري موقف اختيار ڪيو آهي ته اڳوڻي صوبائي صلاحڪار اسماعيل ڏاهري جي خاندان کي مختلف طريقن سان هيسائي ضمانتن وارين درخواستن تان هٿ کڻڻ جي لاءِ موتمار ڌمڪيون ڏنيون پيون وڃن. درخواستگذار حميدا ڏاهري وڌيڪ ميڊيا سان ڳالهائيندي چيو ته سياسي بااثر ماڻهو پوليس سان گڏجي پرائيوٽ ماڻھن اسان جي زمينن، گهرن، بنگلن,اوطاقن , گاڏين ۽ ڪاروبار تي حملا ڪري قبضا ڪري قيمتي سامان کڻي رهيا آهن. درخواست ۾ ڄاڻايو ويو آهي ته اسماعيل ڏاهري ۽ علي رضا ڏاهري جي زندگيءَ کي پڻ خطرو آهي. ملڪ جي آئين ۽ قانون تحت سمورا شهري برابر آهن، ۽ اسان سان پڻ برابري وارو سلوڪ اختيار ڪيو وڃي. اسان کي عدالت مان اميد آهي ته اسان کي قانوني تحفظ ڏياري اسان جي پراپرٽين کي به محفوظ بڻايو ويندو