شڪارپور ۾ ڊپٽي ڪمشنر الطاف احمد چاچڙ جي صدارت هيٺ گڏجاڻي ٿي گذري

گڏجاڻي سنڌ هاءِ ڪورٽ سکر بئنچ جي هڪ کان 4 گريڊ جي نوڪرين جي حڪم جي حوالي سان ٿي

شڪارپور (احسان ابڙو) سنڌ هاء ڪورٽ سکر بئنچ جي پٽيشن ۾ ڏنل حڪم تحت هڪ گريڊ کان چار گريڊ جي نوڪرين لاء ڊپٽي ڪمشنر آفيس شڪارپور ۾ گڏجاڻي۔تفصيل موجب ڊپٽي ڪمشنر آفيس شڪارپور ۾ ڊپٽي ڪمشنر شڪارپور الطاف احمد چاچڙ جي صدارت ۾ گڏجاڻي ٿي گذري۔ گڏجاڻي ۾ ايڊيشنل ڊپٽي ڪمشنر ون ظفر عباس، گورنمينٽ ڊگري ڪاليجن جي پرنسپالن، ڊي اي او سيڪنڊري ۽ ڊي اي او پرائمري اسڪولس، پاپوليشن ڊپارٽمينٽ، ايڪسائيز اينڊ ٽيڪسيشن ڊپارٽمينٽ، هائي وي ڊپارٽمينٽ، بلڊنگس، ايڊيوڪيشن ورڪس، پبلڪ هيلٿ، ايگريڪلچر، سوشل ويلفيئر، بيورو آف اسٽيٽڪس ڊپارٽمينٽ ۽ ضلعي جي ٻين مختلف کاتن جي آفيسرن پڻ شرڪت ڪئي۔ ان موقعي تي ڊپٽي ڪمشنر شڪارپور الطاف احمد چاچڙ چيو ته سنڌ هاء ڪورٽ سکر جي پٽيشن ۾ ڏنل حڪم تحت 1 گريڊ کان 4 گريڊ جي نوڪرين لاء ضلعي جي سڀني آفيسرن کي ڪورٽ جي ليٽر ذريعي آگاهي ڏني آھي ته پنهنجي پنهنجي ڊپارٽمينٽ ۾ 1 گريڊ کان 4 گريڊ جي خالي پيل جاين جي هڪ لسٽ ٺاهي ڏني وڃي ته جيئن اسان ڪورٽ جي حڪم تحت اهي ڊپارٽمينٽل لسٽون ٺاهي چيف سيڪريٽري سنڌ ۽ ايس اينڊ جي ڊي سيڪريٽري کي اماڻي سگهون۔ ڊپٽي ڪمشنر شڪارپور الطاف احمد چاچڙ چيو ته اسان کي سنڌ هاء ڪورٽ سکر، چيف سيڪريٽري سنڌ ۽ ايس اينڊ جي ڊي سيڪريٽري جون سخت هدايتون مليل آھن ته جيترو جلدي ٿي سگهي اسان ڊپارٽمينٽل لسٽون ڏنيون وڃن ته جيئن اسان پنهنجا نمائندا مقرر ڪري 15 کان 20 ڏينهن اندر انهن تي عمل شروع ڪري سگهون۔ ڊپٽي ڪمشنر شڪارپور الطاف احمد چاچڙ چيو ته اسان پهريون ترجيح پٽيشنرن کي ڏينداسين ۽ جن جا والدين سروس دوران گذاري ويا آھن ۽ جيڪي معذور رهجي ويا انهن کي انٽرويو ذريعي انهن کي به نوڪري ۾ کڻنداسين۔