ملير ريجنل پاسپورٽ آفيس ۾ ايف آءِ اي جو وڏو ڪريڪ ڊائون، ڪرپشن نيٽ ورڪ بي نقاب، 7 جوابدار گرفتار

ايجنٽ، ڊيٽا انٽري آپريٽر، فوٽوگرافر ۽ سيڪيورٽي گارڊ گرفتار، شهرين کان 4 کان 5 هزار رپيا رشوت وٺڻ جو انڪشاف

ملير (رپورٽ: عبدالرشيد مورجھريو)وفاقي تحقيقاتي اداري ملير جي ريجنل پاسپورٽ آفيس ۾ وڏي ڪارروائي ڪندي مبينا ڪرپشن نيٽ ورڪ کي بي نقاب ڪري ڇڏيو ۽ 7 جوابدارن کي گرفتار ڪري ورتو آهي گرفتار ٿيلن ۾ ايجنٽ، ڊيٽا انٽري آپريٽر، فوٽوگرافر ۽ سيڪيورٽي گارڊ شامل آهن ايف آءِ اي جي ترجمان موجب ابتدائي جاچ دوران انڪشاف ٿيو آهي ته شهرين کان پاسپورٽ جي ڪم ۾ غيرقانوني سهولت فراهم ڪرڻ عيوض 4 کان 5 هزار رپيا رشوت ورتي ويندي هئي. جوابدار رشوت وٺي غيرقانوني طريقي سان پاسپورٽ جي پروسيسنگ ڪرائيندا هئا جڏهن ته سيڪيورٽي گارڊ رشوت جي رقم لاڳاپيل اهلڪارن تائين پهچائڻ ۾ ملوث هئا ترجمان موجب جوابدارن خلاف انسدادِ بدعنواني قانونن تحت ڪيس داخل ڪيو ويو آهي، جڏهن ته ڪرپشن نيٽ ورڪ جي ٻين سهولتڪارن جي ڳولا لاءِ جاچ جو دائرو وڌيڪ وسيع ڪيو ويو آهي. ايف آءِ اي جو چوڻ آهي ته سرڪاري ادارن ۾ ڪرپشن ۽ رشوتخوري خلاف بنا ڪنهن فرق جي ڪارروايون جاري آهن، جڏهن ته هن ڪيس ۾ وڌيڪ گرفتارين جو به امڪان ظاهر ڪيو ويو آهي.