قومي عوامي تحريڪ پاران 24 نومبر تي ٽنڊو محمد خان ۾ درياءَ بچايو سنڌ بچايو جلسي جو اعلان

سنڌ جي تباهي جي ذميوار حڪمران جماعت آهي سنڌ ۾ ھٿرادو غربت ۽ بدحالي مسلط ڪئي وئي آھي: اياز لطيف پليجو

حيدرآباد (بيورو) قومي عوامي تحريڪ پاران 24 نومبر تي ٽنڊو محمد خان شهر ۾ درياءَ بچايو سنڌ بچايو جلسي عام ڪرڻ جو اعلان. قومي عوامي تحريڪ جي سربراھ اياز لطيف پليجي چيو تہ سنڌ جي تباهي جي ذميوار پيپلزپارٽي ۽ سنڌ حڪومت سنڌ آهي سنڌ ۾ ھٿرادو غربت ۽ بدحالي مسلط ڪئي وئي آھي. پيپلز پارٽي ڪرپشن ڪم۽ اقتدار لاءِ سنڌ جي لکين ايڪڙ زمين ۽ وسيلا ڏئي ڇڏيا آھن. سنڌ جا ماڻھو پنھنجي زمينن ۽ وسيلن جي مالڪي لاءِ جدوجھد جي تياري ڪن. پيپلز پارٽي اقتدار لاءِ ھر سودو ڪرڻ لاء تيار آھي، انڪري چوٿون ڀيرو اقتدار تي مسلط ڪيو ويو آھي. سنڌ ۾ ڌاڙيل راڄ آھي. روزگار ناھي. بک، بدحالي ۽ بيروزگاري آھي. جھالت ۽ لاقانونيت آھي. سنڌ جا ماڻھو عوام دشمن نظام مان بيزار آھن.اياز لطيف پليجي چيو آهي تہ سنڌ ڌاڙيل راڄ، غربت، بدامني، ڪرپشن ۽ بيروزگاري جي گھيري ۾ آھي. سنڌ حڪومت امن امان ۽ ڪوڙن مقابلن کي روڪڻ لاءِ ڌاڙيلن لاءِ عام معافي جو اعلان ڪري تہ جيئن ڏوھن ۾ ملوث ماڻھو پوليس وٽ پيش ٿين. سنگين ڏوھن ۾ ملوث ڏوھارين کي 10 سال سزا ڏني وڃي تہ جيئن اھي واپس اچي پنھنجي آھي زندگي گذاري سگھن. قبائلي جھيڙن، طاقت جي زور تي انتقام، قانون جي حڪمراني نہ ھجڻ ڪري ڏوھ ٿين ٿا. سنڌ حڪومت جي ايجنڊا تي امن ناھي. حڪمران چاھين تہ امن بحال ٿي سگھي ٿو.اياز لطيف پليجي چيو تہ سنڌ سڀ کان وڌيڪ روينيو ڏيندڙ صوبو آھي. سنڌ جو تيل، گئس ۽ ٻيا وسيلا وفاق جي حوالي آھن. سنڌ جي ڪمائي تي سڄو ملڪ ھلي ٿو. سنڌ ۾ جتان گئس نڪري ٿو اتي جا ماڻھو گئس جي سھولت کان محروم ڪيا ويا آھن. ملڪ ۾ سڀ کان وڌيڪ بجلي جي لوڊ شيڊنگ سنڌ ۾ آھي. گئيس جي لوڊ شيڊنگ جو عذاب بہ سنڌ ۾ آھي. سڀ کان وڌيڪ مھانگائي بہ سنڌ ۾ آھي. ملڪ ۾ سڀ کان وڌيڪ ڪرپشن بہ سنڌ ۾ آھي.