ملير پوليس پاران ايڊيشنل ايس ايڇ او جي اغوا ۾ ملوث ٽن جوابدارن کي گرفتار ڪرڻ جي دعويٰ

ايڊيشنل ايس ايڇ او حبيب الله شاهاڻي جي اغوا ۾ ملوث 3 جوابدارن کي گرفتار ڪيو ويو آهي: پوليس

ملير (رپورٽ: عبدالرشيد مورجھريو) اسٽيل ٽائون ٿاڻي جي ايڊيشنل ايس ايڇ او جي اغوا وارو معاملو، پوليس مختلف هنڌن تي ڇاپا هڻي اغوا ۾ ملوث 3 جوابدار گرفتار، اغوا ڪارن وٽان 8 هزار ڪلو سوپاريون ۽ گاڏيون هٿ ڪرڻ جي دعوي، تفصيل موجب ملير جي اسٽيل ٽائون ٿاڻي جي ايڊيشنل ايس ايڇ او حبيب الله شاهاڻي کي 26 آڪٽوبر تي اغوا ڪارن اغوا ڪري بلوچستان کڻي وڃي تشدد بعد آزاد ڪري ڇڏيو هو، ان سلسلي ۾ جاچ پوليس پڌرائي ڪئي آهي ته ايڊيشنل ايس ايڇ او حبيب الله شاهاڻي جي اغوا ۾ ملوث 3 جوابدارن کي گرفتار ڪيو ويو آهي گرفتار جوابدارن جي قبضي مان 8 هزار ڪلو پابندي پيل سپاري 3 گاڏيون ريوو، الٽس ڪار ۽ وين هٿ ڪئي وئي آهي، پڌرائي ۾ ٻڌايو ويو آهي ته ايڊيشنل ايس ايڇ او جي اغوا ۾ ملوث جوابدارن جي گرفتاري لاءِ ماڙي پور، ڪورنگي سميت مختلف علائقن ۾ ڇاپا هنيا ويا ۽ اغوا ۾ ملوث 3 جوابدارن سليم، حبيب الله ۽ محمود کي گرفتار ڪري ورتو آهي، شروعاتي جاچ ۾ جوابدارن ڏوهه جو اعتراف ڪيو آهي ته پوليس اسان جي گدام تي ڇاپو هنيو ان تي انسپيڪٽر کي اغوا ڪري بلوچستان کڻي وياسين، پوليس موجب وقت تائين 5 جوابدارن کي گرفتار ڪيو ويو آهي جڏهن ته 3 فرار ٿي ويا آهن، جوابدار بلوچستان کان منشيات کڻي ڪراچي سميت مختلف شهرن ۾ وڪرو ڪندا آهن، جوابدارن کي ٽيڪنيڪل بنيادن تي گرفتار ڪري ورتو آهي جوابدارن انسپيڪٽر کي اغوا جو اعتراف ڪري ورتو آهي وڌيڪ جاچ ڪئي پئي وڃي فرار ٿي ويل جوابدارن کي به گرفتار ڪيو ويندو.