ڪراچي پريس ڪلب ھڪ تاريخي ادارو آھي جنھن جو جمھوريت جي لاءِ اھم ڪردار آھي: آصف حيدر شاھھ

سالانھ قسطن تي ڏني پئي وڃي، ڪراچي پريس ڪلب مالي مسئلن کي منھن ڏئي رھيو آھي، رقم گڏيل ادا ڪئي وڃي:صدر/سيڪريٽري

ڪراچي (رپورٽر) چيف سيڪريٽري سنڌ آصف حيدر شاھھ چيو آھي تھ ڪراچي پريس ڪلب ھڪ تاريخي ادارو آھي جنھن جو جمھوريت جي لاءِ اھم ڪردار آھي، اڱاري ڏينھن تي چيف سيڪريٽري سنڌ سيد آصف حيدر شاهه پاران ڪراچي پريس ڪلب جو دورو ڪيو. ان موقعي تي صدر ڪراچي پريس ڪلب سعيد سربازي ۽ سيڪريٽري شعيب خان سميت گورننگ باڊي جي عھديدارن پاران استقبال ڪيو ويو. ڪراچي پريس ڪلب جي صدر، سيڪريٽري ۽ گورننگ باڊي پاران چيف سيڪريٽري سنڌ کي ڪراچي پريس ڪلب جو سووينئر ۽ سنڌ جو تحفو اجرڪ پيش ڪيو ۽ پريس ڪلب جي مختلف شعبن جو دورو ڪرايو ويو، ان موقعي تي جوائنٽ سيڪريٽري محمد منصف، ميمبر گورننگ باڊي نواب قريشي، شمس ڪيريو، نور محمد ڪلھوڙو، مونا صديقي، شعيب احمد بھ موجود ھئا، صدر ۽ سيڪريٽري سالانھ گرانٽ بابت ڳالھائيندي ٻڌايو تھ گرانٽ قسطن تي ڪري ڏني پئي وڃي، جنھن جي ڪري ڪراچي پريس ڪلب کي ڪيترائي مالي مسئلن کي منھن ڏيڻو پئجي رھيو آھي، جيئن تھ بقايا رقم گڏيل ادا ڪئي وڃي تھ جيئن مسئلن تي قابو آڻي سگھجي، چيف سيڪريٽري آصف حيدر شاھھ يقين ڏياريو تھ ڪراچي پريس ڪلب جي سالانھ گرانٽ جي رقم جلد ادا ڪئي ويندي، ۽ ان سسلسلي ۾ ھر ممڪن پنھنجو ڪردار ادا ڪندس، جڏھن تھ صحافي ڪالوني ھاڪس بي جي ترقياتي ڪمن ۽ 700 نون ميمبرن جي پلاٽس بابت ڪاغذي ڪاروائي ڪافي حد تائين مڪمل ٿي چڪي آھي ان سلسلي ۾ ايندڙ ھفتي اجلاس طلب ڪري معاملن کي حتمي شڪل ڏني ويندي، سيد آصف حيدر شاھھ چيو تھ ڪراچي پريس ڪلب جو جمھوريت ۽ ملڪ جي تعمير ۽ ترقي ۾ اھم ڪردار آھي، منھنجو ڪراچي پريس ڪلب سان ڪافي پراڻو تعلق آھي، صحافين جي لاءِ ڪراچي پريس ڪلب جون خدمتون مثالي آھن، پريس ڪلب ھميشھ جمھوري ادارن جي فروغ لاءِ پنھنجو ڪردار ادا ڪيو آھي، ھن چيو تھ صحافين جي مسئلن جو حل حڪومت جي پھرين ترجيح آھي، ان حوالي سان قدم کنيا ويا آھن، چيف سيڪريٽري چيو تھ صحافي ڪنھن بھ معاشري جو آئينو ھوندا آھن، ان پاران عوامي مسئلن جي نشاندھي ڪئي ويندي آھي.