ڀاڻ ۽ پاڻي جي کوٽ پيدا ڪري زراعت کي ھٿرادو نموني تباھ ڪيو پيو وڃي: اياز لطيف پليجو

ڀاڻ ۽ پاڻي جي کوٽ پيدا ڪري زراعت کي ھٿرادو نموني تباھ ڪيو پيو وڃي: اياز لطيف پليجو

حيدرآباد(بيورو)قومي عوامي تحريڪ جي سربراھ اياز لطيف پليجي چيو آهي تہ ڪڻڪ جي پوکائي دوران ڀاڻ بليڪ تي وڪرو ڪندڙ مافيا خلاف ڪارروائي ڪئي وڃي. زراعت کي ھٿرادو نموني تباھ ڪيو پيو وڃي. فصلن سٺا ٿين ٿا تہ اگھ ڪيرايا وڃن ٿا. پاڻي جي ھٿرادو کوٽ جي ڪري آباد زمينون ڀڙڀانگ ٿي ويون آھن، نقلي زرعي دوائن، نقلي ٻج ۽ ڀاڻ ۽ پاڻي جي ھٿرادو کوٽ جي ڪري آبادگارن ۽ ھارين جو معاشي قتل ڪيو وڃي ٿو. سنڌ جي معاشي بدحالي جي ڪري بيروزگاري وڌي آھي. بدامني ۽ منشيات وڌي وئي آھي. اياز لطيف پليجي چيو تہ زراعت جي بحالي سان سنڌ خوشحال ٿيندي.الميو آھي جو حڪومت جي ايجنڊا تي سنڌ جي معاشي ترقي ۽ خوشحالي ناھي. سنڌو درياھ ۾ پاڻي بدران واري اڏامي رھي آھي. ڏيڍ سئو سالن کان سنڌو درياھ جي پاڻي تي ڌاڙا لڳي رھيا آھن. ارسا سنڌ جي پاڻي ۾ سھولتڪار جو ڪردار ادا ڪري رھيو آھي. وفاق ۾ ويٺل حڪمرانن کي سنڌ نظر نٿي اچي. جنھنڪري سنڌ کي پنھنجي حصي جو پاڻي نٿو ڏنو وڃي. جيڪو پاڻي ملي ٿو ان تي پ پ حڪمرانن جو قبضو آھي. اياز لطيف پليجي چيو تہ سنڌ جي زرعي معيشت جي بحالي لاءِ ھٿرادو ڀاڻ ۽ پاڻي جو کوٽ ختم ڪئي وڃي. نقلي زرعي دوائن ۽ نقلي ٻج جي ڪڌي ڪاروبار ۾ ملوث مافيا خلاف ڪارروائي ڪري کين سزائون ڏنيون وڃن. ۽ متاثر آبادگارن ۽ ھارين کي نقصان جو معاوضو ڏنو وڃي.