نيو ڪراچي جي سپر ھاءِ وي وٽ لياري ندي جي پل زبون حالي جو شڪار

نيو ڪراچي جي سپر ھاءِ وي وٽ لياري ندي جي پل زبون حالي جو شڪار

گڏاپ (رپورٽر)نيو ڪراچي کي سپر هاءِ وي جمالي پل سان ڳنڍڻ واري پل هنڌان هنڌان اکڙي وئي. لياري ندي واري پل زبون حالي جو سبب پل کي خطرناڪ کڏو پئجي ويو جيڪو ڪنھن بہ ٽائيم وڏي حادثي جو سبب بڻجي سگھي ٿو. رات جي پھر ۾ توڙي ڏينهن جو تيز رفتار گاڏين سان حادثا به روزانو جو معمول بڻجي ويا. ذريعن موجب نيو ڪراچي ٽريفڪ پوليس اور لوڊ ٽرالر توڙي لوڊ گاڏين کان ڳري رشوت وٺي پل تان گزرن جي اجازت ڏيڻ ۾ پڻ مصروف آهن. جڏھن ته عوام جي بار بار شڪايتن باوجود سهراب ڳوٺ ٽائون انتظاميه توڙي نيو ڪراچي ٽائون انتظاميه ڪوبه ڌيان نه ڏنو. بار بار سوشل ميڊيا توڙي اليڪٽرانڪ ميڊيا ذريعي پل جون خبرون ھلڻ توڙي عوام جي احتجاج جو ڪنھن بہ ڪاموري نوٽس نه ورتو. ضلعي سينٽرل صبا سينما ڀرسان لياري ندي واري پل جيڪا نيو ڪراچي کي سپر هاءِ وي جمالي پل ۽ نيو سبزي منڊي سان ڳنڍي ٿي، جيڪا گزريل ڪيترن ئي عرصي کان زبون حالي جو شڪار آهي. جيڪا ميئر ڪراچي سميت چونڊيل حڪومتي نمائندن جي نظرن کان اوجھل آھي. ھن پل مان روزانو ھزارن جي تعداد ۾ شھري سفر ڪن ٿا جن کي مين روڊن تي پيل کڏن ۽ زبون حالي پل تان گزرڻ ۾ ڪافي ڏکيائين کي منهن ڏيڻو پئجي رهيو آهي. پل جي مين روڊ تي پيل کڏو ڪنھن به وقت وڏي حادثي جو سبب بڻجي سگھي ٿو. شهرين ميئر ڪراچي مرتضيٰ وهاب کان مطالبو ڪيو آهي ته لياري ندي صبا سئنيما پل جو فوري طور نوٽيس وٺي ان جي مرمت ڪرائي وڃي عوام کي سفري سهولتون فراھم ڪيون وڃن.