سنڌ ۾ اڃا تائين پنج سئو افغاني بھ گرفتار ناھن ڪيا ويا: اياز لطيف پليجو

سنڌ ۾ اڃا تائين پنج سئو افغاني بھ گرفتار ناھن ڪيا ويا: اياز لطيف پليجو

حيدرآباد)بيورو) قومي عوامي تحريڪ جي سربراھ اياز لطيف پليجي چيو آھي تہ پنجاب ۽ ٻين صوبن ۾ غير قانوني افغانين خلاف آپريشن نظر اچي ٿو، لکين افغاني واپس ٿي چڪا آھن ۽ سنڌ ۾ اڃا تائين پنج سئو افغاني بہ گرفتار ناھن ڪيا ويا. سنڌ ۾ آپريشن جي نالي ۾ ڊرامو ڪيو پيو وڃي. سنڌ ۾ لکين غير قانوني افغاني ۽ ٻين پرڏيھين کي شناختي ڪارڊ ۽ ٻيا ڪاغذ ٺاھي ڏيندڙ عملدارن کي گرفتار ڪري انھن کي نوڪرين مان خارج ڪيو وڃي. رشوت ڏئي جعلسازي سان شناختي ڪارڊ ۽ ٻيا ڪاغذ ٺھرائيندڙ اليگل اميگرينٽس کي پڪڙي واپس پنھنجي ملڪن ڏانھن موڪليو وڃي. . اياز لطيف پليجي چيو تہ ڪرپٽ مافيا سنڌ جي وسيلن ۽ وحدت کي داءُ تي لڳائي ڇڏيو آھي. لکين ايڪڙ زمين بلڊر مافيا جي قبضي ۾ آھي. ڪڏھن ڪارونجھر، ڪڏھن ڪوھستان، ڪڏھن ساحلي پٽي، ڪڏھن ٻيٽ وڪرو ڪيا وڃن ٿا.اياز لطيف پليجي چيو تہ پيپلزپارٽي جي گذريل حڪومت ۾ ترقياتي ڪمن جي نالي ۾ اربين روپيا خرچ ڪيا ويا آھن پر سنڌ ۾ ھڪ بہ اھڙي يونين ڪاؤنسل ناھي جيڪس ماڊل ھجي ۽ سموريون بنيادي سھولتون ھجن. اياز لطيف پليجي چيو تہ سنڌ ۾ 18 ضلعن ۾ ماڻھن کي گٽر مليل پيئڻ جو پاڻي فراھم ڪيو وڃي ٿو. شھر ڪچري جو ڍير ۽ ٻھراڙيون کنڊر بنيل آھن. ھوڏانھن قومي عوامي تحريڪ پاران سڀاڻي (اڄ) قومي عوامي تحريڪ جي سربراھ اياز لطيف پليجو جي 55 ھين سالگرھ سڄي سنڌ ۾ ملھائي ويندي. جڏهن تہ نصيرآباد شهر ۾ اياز لطيف پليجي جي اڳواڻي ۾ محبت سنڌ ريلي ڪڍي ويندي.ريلي کانپوءِ سالگرھ ۽ محبت سنڌ جلسي عام ڪيو ويندو جنھن م 20 پائونڊ سالگرھ جو ڪيڪ پڻ ڪٽيو ويندو. سنڌياڻي ثقافتي گروپ پاران قومي گيتن تي ٽيبلوز ڪيا ويندا، آخر ۾ محفل موسيقي ٿيندي جنهن ۾ مشهور نالي وارا فنڪار منظور سخراڻي، خوشبو لغاري ۽ ٻيا فنڪار قومي گيت پيش ڪندا.