1980کانپوءِ ملڪ اندر آيل سمورن افغانين کي ملڪ بدر ڪيو وڃي: ڊاڪٽر نياز ڪالاڻي

186 views | 05th Oct 2023 • سنڌي خبرون

دھشتگردي جا واقعا وڌيا آھن، منشيات عام ٿي وئي آهي، خودڪش بمبار به افغانين مان پيدا ٿي رھيا آھن: پنھل ساريو

نوشهروفيروز (ڊ ر) جيئي سنڌ قومي محاذ جي مرڪزي اڳواڻ ڊاڪٽر نياز ڪالاڻي، رواداري تحريڪ جي اڳواڻ پنھل ساريو وفاقي حڪومت پاران افغانين کي ملڪ نيڪالي ڏيڻ واري عمل کي ساراهيندي مطالبو ڪيو آھي ته 1980 کانپوءِ آيل سمورن افغانين کي ملڪ بدر ڪيو وڃي. پريس ڪلب نوشهروفيروز ۾ ميڊيا سان ڳالهائيندي ھن وڌيڪ چيو ته ھن وقت ملڪ ۾ 75 لک افغاني رھندڙ آھن جن مان لکين افغانين ملڪ جو سڃاڻپ ڪارڊ ۽ پاسپورٽ ٺھرائي ڇڏيا آھن جيڪي رد ڪيا وڃن. ھنن چيو ته افغانين سبب ملڪي معيشت تباھ ٿي آھي دھشتگردي جا واقعا وڌيا آھن. منشيات عام ٿي وئي آهي. خودڪش بمبار به افغانين مان پيدا ٿي رھيا آھن. ھنن چيو ته اسان کي ھڪ افغاني قبول ناھي ان ڪري سمورن افغانين جي ملڪ بدر ٿيڻ تائين احتجاج جاري رهندو. ھنن اعلان ڪيو 8 آڪٽوبر تي گو افغاني گو ريلي محرابپور ۾ ڪڍي ويندي.