ماڙي جلباڻي ڪيس داخل: اھلڪارن گاڏين مان لھندي ئي سڌي فائرنگ ڪري ڏني: فريادي

سڪرنڊ: ماڙي جلباڻي ۾ پوليس ۽ رينجرز اهلڪارن ھٿان قتل ٿيل ڳوٺاڻن جو ڪيس داخل

سڪرنڊ ويجهو ڳوٺ ماڙي جلباڻي ۾ رينجرز ۽ پوليس جي گڏيل ڪارروائي ۽ گهر گهر تلاشي دوران ڳوٺاڻن جي مزاحمت تي فائرنگ ۾ 4 ڳوٺاڻا قتل ۽ 4 ڄڻا زخمي ٿيڻ واري واقعي جو ڪيس ماڙي جلباڻي ٿاڻي تي فوتي جي ڀاءَ راهب جلباڻي جي مدعيت ۾ گناهه نمبر 39/2023 تحت قلم 324,302 تحت داخل ڪيو ويو آهي. جنهن ۾ فريادي ڄاڻايو آهي ته وقت اٽڪل پوڻا 3 بجي ڌاري گهرن ۾ ويٺا هئاسون
ڏٺوسون ته گهر جي دروازي جي سامهون پنج پوليس موبائلون ، هڪ اڇي ۽ هڪ ڪاري ڪلر جي ويگو ۽ ٽي قانون نافذ ڪندڙ ادارن جون گاڏيون بيٺيون هيون جنهن مان 40/45 مختلف سرڪاري ورديون پهريل ڏهه سول ڪپڙن ۾ ملبوس ماڻهو لٿا
جن لهڻ سان چيو ته توهان دهشتگرد آهيو اڄ توهان نه ڇڏينداسون ماري خون ڪنداسون
ايئن چئي سڌي فائرنگ ڪرڻ شروع ڪري جنهن فائرنگ ۾ منهنجو ڀاءَ سجاول جلباڻي ۽ عزيز نظام الدين جلباڻي ٿڏي فوت ٿي ويا ۽ هر هڪ امام بخش جلباڻي ۽ ممتاز جلباڻي ، امام الدين جلباڻي ۽ الهداد جلباڻي، سارنگ جلباڻي ، علي نواز جلباڻي ۽ لياقت جلباڻي زخمي ٿي پيا جنهن بعد زخمين کي کڻائڻ لاءِ شديد فائرنگ سبب ڳوٺاڻا گڏ ٿي ويا.
پوءِ ڳوٺاڻن جي مدد سان فوتين ۽ زخمين کي کڻائي تعلقه اسپتال سڪرنڊ آياسون پئي ته رستي ۾ امام بخش ۽ ميهار پڻ فوت ٿي ويا پوءِ اسان چئني فوتين جا لاش نيشنل هائي تي رکي احتجاج ڪيوسون پوءِ چئني لاشن جا پوسٽ مارٽم ڪرائي فارغ ٿي حاضر اچي فرياد ٿو ڪريان ته جانچ ٿئي.