گھوڙاٻاري ويجھو نصير واھ شاخ ۾ پاڻي جي اڻھوند خلاف احتجاجي مظاھرو

آبادگارن ۽ ھارين پاران پاڻي کوٽ ۽ فصل سوڪھڙي جو شڪار ٿيڻ خلاف احتجاج ڪيو ويو

ٺٽو( ڊ ر) گھوڙاٻاري جي نصير واھ شاخ جي زميندارن، آبادگارن ۽ سوين ڳوٺاڻن علائقي ۾ 2017ع کان پاڻي نہ پھچڻ ڪري زمينون بنجر ٿيڻ توڙي فصل سوڪھڙي جو شڪار ٿيڻ خلاف ٺٽي ۾ احتجاجي مظاھرو ڪري ڌرڻو ھڻي زوردار نعريبازي ڪندي جلد نصير واھ شاخ ۾ پاڻي جي فراھمي کي يقيني بنائڻ جي گھر ڪري ڇڏي اھي، ان سلسلي ۾ سامونڊي پٽي جي تعلقي گھوڙاٻاري جي ديھ سمڪي، مڙھي جي ڪيترن ئي آبادگارن محمد شريف چاڙو، الھڏنو چاڙو، ڪرم علي چاڙو، گل حسن ماڃريو، عباس ڄاموٽ، الھڏنو شاھ، مير جلباڻي، ارباب مبارڪ سمون، عرس ماڃريو، محمد بخش جاڙو، شبير احمد جاڙو، الھڏنو ڀٽي، يوسف ڀٽي، نور حسن سمون، ڊاڪٽر مظھر سومرو جي اڳواڻي ۾ ٺٽص ۾ احتجاجي مظاھرو ڪندي چيو تہ 2017ع ۾ ڪي بي برانچ پڪو ٿيڻ کانپوءِ سندن علائقي ۾ پاڻي اچڻ بند ٿي ويو آھي، سندن علائقي جي نصير واھ شاخ ۾ پاڻي نہ ھجڻ ڪري ھزارين ايڪڙن تي پوکيل فصل سوڪھڙي جو شڪار ٿيڻ سميت سارين جو ٻيجارو بہ پوکي ناھيو سگھيا، جنھن ڪري کين ڪروڙين روپين جو نقصان پھچي رھيو آھي، ھاڻي تہ پيئڻ لاءِ بہ پاڻي ميسر ناھي، جر کارو ٿي ويو آھي، پاڻي نہ ھجڻ ڪري انساني آبادي سميت آب جيوت خطري ۾ اچي ويئي آھي. ھنن چيو تہ ڪيترائي ڀيرا پاڻي جي کوٽ بابت اعليٰ اختيارين کي آگاھي ڏني آھي پر ڪوبہ نوٽيس وٺڻ لاء تيار ناھي، جنھن ڪري علائقي ۾ ڏڪار واري صورتحال پيدا ٿيڻ ڪري ماڻھو لڏپلاڻ ڪرڻ تي مجبور بڻيل آھن. ھنن مطالبو ڪيو تہ نصير واھ شاخ ۾ جلد پاڻي جي فراھمي کي يقيني بنائي کين پريشانين کان بچايو وڃي، ٻئي صورت ۾ سخت احتجاج ڪيو ويندو.