اسان کي عربن جي دور انديشي، ترقي ۽ رواداري مان سکڻو پوندو: اياز لطيف پليجو

قومي عوامي تحريڪ جي سربراھ اياز لطيف پليجو کي دبئي، عجمان ۽ شارجه ۾ آجياڻا

حيدرآباد (بيورو) قومي عوامي تحريڪ جي سربراھ اياز لطيف پليجو کي دبئي، عجمان ۽ شارجه ۾ آجياڻا ڏنا ويا. ان موقعي تي ھن خطاب ڪندي چيو تہ اسان کي عربن جي دور انديشي، ترقي ۽ رواداري مان سکڻو پوندو. دبئي، نيوم، شرم الشيخ، بالي، استنبول ۽ لنڪاوي جا شهر بہ مسلمان ملڪن ۾ آهن. امارات ۾ رهندڙ سنڌي وڌ ۾ وڌ هم وطنن کي هتي روزگار لاءِ گهرائين. دبئي وانگر پاڪستان مان بہ غير قانوني رهندڙن کي سندن ملڪن ڏانهن واپس موڪليو وڃي. بدقسمتيءَ سان پاڪستان جي ڪا بہ يونيورسٽي دنيا جي نامور يونيورسٽين ۾ شامل ناهي. اياز لطيف پليجي چيو تہ اسان کي سڄي دنيا سان گڏ هلڻ گهرجي، جيڪڏهن اسان اڪيلا ٿياسين تہ تباھ ٿي وينداسين. شاگردن کي خيالي دنيا مان ڪڍي حقيقي سائنسي دنيا ۾ آڻڻو پوندو. اياز لطيف پليجي چيو تہ پاڪستاني شاگردن کي سعودي عرب ۽ نار ۾ ٿيندڙ تبديلين کان آگاھ ڪيو وڃي. سنڌ تهذيب جي ماءُ آهي، دنيا کي سنڌو تهذيب تي فخر آهي. اياز لطيف پليجي چيو تہ ڪنڌڪوٽ ڪشمور ۾ روزانو ماڻهو اغوا ٿين ٿا پيپلزپارٽي ظلم سردارن، ڌاڙيلن ۽ ڏوهارين جي سھولت ڪار آهي، سنڌ کي سرداري نظام، ڏوهن ۽ وڏيرا شاهي جو مرڪز بڻايو ويو آهي. ڪو بہ معاشرو برداشت ۽ رواداري کانسواءِ ترقي نٿو ڪري سگهي. ملڪ معاشي بحران ۾ آهي، هنگامي قدم کنيا وڃن. اياز لطيف پليجي چيو تہ ملڪ ۾ سياسي ۽ معاشي بحران پيدا ڪيو ويو آهي. وفاقي ۾ اقتدار جي جنگ آهي، وڏين سياسي پارٽين جي مفادن جي جنگ ۾ پاڪستاني عوام نشانو بڻيل آهي. پاڪستان انصاف، آئين ۽ قانون جي بالادستي ۽ حڪمراني کانسواءِ اڳتي نہ وڌي سگهندو، پاڪستان کي هڪ نئين معاشي، آئيني ۽ سماجي چارٽر جي ضرورت آھي اياز لطيف پليجي چيو تہ انتهاپسندي، جهالت ۽ ڪرپشن کي پاڙان پٽڻ گهرجي. سمورن ڪرپٽ آفيسرن ۽ سياستدانن کي گرفتار ڪيو وڃي. پندرهن سالن کان ملڪ کي غير يقيني واري صورتحال ۾ رکي نقصان پهچايو ويو. جيڪڏهن عمران، نواز ۽ زرداري چئن صوبن لاءِ سوچين ها تہ اهڙي صورتحال نہ هجي ها. اياز لطيف پليجي چيو تہ سنڌ مان چونڊيل سمورين پارٽين جي ميمبرن عوام کي مايوس ڪيو آهي. وفاق پاڻي، گئس، بجلي، روزگار ۽ وسيلن جي حوالي سان سنڌ سان انصاف ڪري. جمهوريت کي عورتن، هارين ۽ اقليتن جي حقن سان ڳنڍڻو پوندو. سنڌ سميت سڄي ملڪ ۾ ميرٽ، امن ۽ برابري چاهيون ٿا.