شڪارپور ۾ بدامني کان متاثر سماج ۽ ان جي حساس طبقي واري معاملي بابت اديبن جي ويھڪ

ويهڪ ۾ سجاد مھر، عديل مھر، پرويز ابڙو، وسيم شيخ، پروفيسر خالد وسير، نسيم بخاري ۽ اسرار جُھلڻ شريڪ

شڪارپور ( احسان ابڙو ) بدامني کان متاثر سماج ۽ ان جي حساس طبقي واري معاملي تي شڪارپور جي اديبن جي ويھڪ. امن امان کي يقيني بڻائڻ لاءِ حڪمت عملي جوڙي وئي.سماج ۾ وڌندڙ بدامني ڏينھن ڏٺي جو ڦر ، ڌاڙن واري وڌندڙ رجحان ۽ ان حوالي سان نامياري ليکڪ عديل مھر سان تازو پيش آيل ڦر واردات خلاف شڪارپور جي اديبن ، شاعرن ۽ سماج سڌارڪن جي ھڪ اھم گڏجاڻي ھڪ مقامي ھوٽل ۾ شڪارپور سماجي ۽ ادبي فورم جي ميزباني ھيٺ ٿي گذري جنھن ۾ شاعر سجاد مھر ، ڪالمسٽ ، عديل مھر ، سماج سڌارڪ پرويز ابڙو ، وسيم شيخ ، پروفيسر خالد وسير ، ليکڪ نسيم بخاري ۽ اسرار جُھلڻ شرڪت ڪئي.گڏجاڻي ۾ شڪارپور ۾ وڌندڙ بدامني تي سخت ڳڻتيءَ جو اظھار ڪيو ويو ۽ شھر ۾ امن و امان کي ھر صورت ۾ يقيني بڻائڻ جي حوالي سان جدوجھد جي مختلف پهلوئن تي سنجيده سوچ ويچار کان پوءِ ھڪ حڪمت عملي جوڙي وئي جنھن جي روشني ۾ مرحليوار جدوجھد تي اتفاق ڪيو ويو.