ڪراچي جي فيڪٽري ۾ گئس ليڪ ٿيڻ سبب 29عورتون ۽ ڇوڪريون بيهوش

11عورتن جي حالت خراب آهي، 18 عورتن ۽ ڇوڪرين جي حالت سڌرندڙ آهي: ايس ايس پي ڪياماڙي

ڪراچي(اسٽاف رپورٽر) ڪراچي ۾ فوڊ فيڪٽري مان گيس ليڪ ٿيڻ سبب 29 عورتون ۽ ننڍي عمر جون ڇوڪريون بيهوش، وڏي وزير نوٽيس ورتو، ڪياماڙي واري علائقي فشري جي مين گيٽ ڀرسان فوڊ فيڪٽري ۾ اوچتو گيس ليڪ ٿي وئي، امونيا گيس جي بدبوءِ ڦهلجڻ سبب 29 عورتون ۽ ٻارڙيون بيهوش ٿي ويون، ايس ايس پي ڪياماڙي موجب عورتون پيڪنگ جو ڪم ڪري رهيون هيون، گيس پائيپ مان گيس ليڪ ٿي، بدبوءِ سبب عورتون ۽ ننڍي عمر جون ڇوڪريون بيهوش ٿي ويون. ايس ايس پي ڪياماڙي موجب فيڪٽري ۾ ڪو ڌماڪو وغيره نه ٿيو، پائيپ مان گيس ليڪ ٿي، جاچ ڪريون پيا ته گيس ليڪ وارو واقعو ڪٿي ڪرائيم ته ناهي، جيڪڏهن ڪنهن هٿ سان گيس ليڪ ڪئي ته ايف آئي آر داخل ڪئي ويندي. هن چيو ته 11 عورتن جي حالت خراب آهي، 18 عورتن ۽ ڇوڪرين جي حالت سڌرندڙ آهي. بيهوش ٿيلن ۾ حليمه زال شڪور، نسيمه زال محمود، نورين ڌيءَ واحد، نسرين ڌيءَ اقبال، محمودہ زال عمران، آمنہ زال ڪبير، سڪينه زال حنيف، محمودہ ڌيءَ صديق، غزره زال فرقان ۽ ٻيون شامل آهن.