ملير جي لال محمد نوحاڻي ڳوٺ ۾ سھولتن جي کوٽ خلاف احتجاج

جديد دور ۾ بھ رھواسي پاڻي، گئس ۽ ٻين سھولتن کان وانجھيل آھن: مظاھرين

ملير (رپورٽ: عبدالرشيد مورجھريو) ملير جي پراڻي ڳوٺ لال محمد نوحاڻي ڳوٺ جا رهواسي بجلي، پاڻي ۽ گئس جهڙين بنيادي سهولتن کان محروم ٿي سخت پريشانين کي منهن ڏئي رهيا آهن ڳوٺ جي رهواسين بنيادي سهولتن جي کوٽ خلاف پرامن احتجاجي مظاهرو ڪندي لاڳاپيل ادارن ۽ اعليٰ اختيارين کان فوري نوٽيس وٺڻ جو مطالبو ڪيو آهي احتجاج ڪندڙن موجب ڳوٺ ۾ گذريل 20 ڏينهن کان بجلي جي فراهمي مڪمل طور بند آهي جنهن سبب روزمرهه جا معمول ۽ گهريلو سرگرميون سخت متاثر ٿي رهيون آهن. بجلي بند هجڻ ڪري ڳوٺ جون بورنگون ۽ پاڻي جون موٽرون پڻ گذريل 7 کان 8 ڏينهن کان بند آهن، جنهن سبب پيئڻ ۽ عام استعمال جي پاڻي جو شديد بحران پيدا ٿي ويو آهي رهواسين جو چوڻ آهي ته بجلي ۽ پاڻي جي بحران سان گڏ علائقي ۾ گئس جي فراهمي به نه هجڻ برابر آهي، جڏهن ته بجلي ۽ گئس جي بندش جو ڪو مقرر وقت يا شيڊول به موجود ناهي احتجاج ڪندڙ شهرين موجب بنيادي مسئلن جي حل لاءِ لاڳاپيل ادارن کي ڪيترائي ڀيرا لکت ۾ درخواستون ۽ شڪايتون ڏنيون ويون آهن، پر اڃا تائين ڪو اثرائتو قدم نه کنيو ويو آهي لال محمد نوهاڻي ڳوٺ جي رهواسين اعليٰ اختيارين، ضلعي انتظاميا ۽ لاڳاپيل بجلي، پاڻي ۽ گئس جي ادارن کان مطالبو ڪيو آهي ته ڳوٺ ۾ بجلي، پاڻي ۽ گئس جي فراهمي فوري طور بحال ڪئي وڃي ۽ ڊگهي عرصي کان جاري عوامي پريشانين جو مستقل بنيادن تي ازالو ڪيو وڃي.