سي آءِ اي پوليس جو مبينا مقابلو، ڊاڪٽر آڪاش قتل ڪيس ۾ گرفتار 3 جوابدار مارجي ويا

ملير (رپورٽ: عبدالرشيد مورجھريو) اسپيشل انويسٽيگيشن يونٽ (ايس آءِ يو) / سي آءِ اي ڪراچي جي ٽيم ملير ڀرسان ٿاڻو گلشن معمار جي حد احمد بروهي ڳوٺ، ناردرن باءِ پاس ٽول پلازه ويجهو ڪارروائي دوران پوليس مقابلي ۾ ڊاڪٽر آڪاش قتل ڪيس ۾ گهربل ۽ جاچ هيٺ ٽن جوابدارن کي مارڻ جي دعويٰ ڪئي آهي، جڏهن ته هڪ پوليس اهلڪار زخمي ٿي پيو ايس ايس پي ايس آءِ يو / سي آءِ اي ڪراچي جي ترجمان موجب جوابدار سريش، رام چند ۽ انيل، تعزيرات پاڪستان تحت داخل ڪيس ۾ ٿاڻو فريئر وٽ جاچ هيٺ هئا. پوليس کين سندن ساٿين جي گرفتاري لاءِ نشاندهي خاطر مذڪوره هنڌ تي وٺي وئي هئي.ترجمان موجب،ڪارروائي دوران جوابدارن جي ساٿين پوليس پارٽي کي ڏسي فائرنگ شروع ڪري ڏني، جنهن تي پوليس به جوابي فائرنگ ڪئي. فائرنگ جي ڏي وٺ دوران جوابدارن جي ساٿين جي فائرنگ سبب زيرِ حراست جوابدار سريش، رام چند ۽ انيل سخت زخمي ٿي پيا، جڏهن ته هڪ پوليس اهلڪار پڻ زخمي ٿيو. پوليس موجب زخمين کي فوري طور جناح اسپتال منتقل ڪيو پئي ويو، پر ٽيئي جوابدار رستي ۾ زخمن جا سور نه سهندي فوت ٿي ويا، جڏهن ته زخمي اهلڪار کي طبي امداد فراهم ڪئي پئي وڃي ايس آءِ يو اختيارين جو چوڻ آهي ته فرار ٿيل جوابدارن جي گرفتاري لاءِ سرچ آپريشن جاري آهي، جڏهن ته واقعي بابت وڌيڪ قانوني ڪارروائي ۽ جاچ پڻ جاري آهي.