حيدرآباد ۾ سنڌي گرلز اسٽوڊنٽس تحريڪ پاران انساني حقن ۽ قانون بابت ٽي روزه ورڪشاپ

جاگيرداراڻي سماج ۾ عورتن کي پنهنجي حقن بابت ڪا ڄاڻ ئي ناهي، نہ ئي ان کي ڪا ڄاڻ ڏني وڃي ٿي: اياز لطيف پليجو

حيدرآباد(بيورو) حيدرآباد ۾ سنڌي گرلز اسٽوڊنٽس تحريڪ جو انساني حقن ۽ قانون بابت ايڪول لا ڪاليج حيدرآباد ۾ ٽي روزه ورڪشاپ ٿيو، جنھن ۾ قومي عوامي تحريڪ جي سربراھ اياز لطيف پليجو، وڪيل ارشاد چنا عورتن جي بنيادي حقن، ڊاڪٽر گلزار جماڻي سماج ۾ نفسياتي مسئلن، ايڊووڪيٽ ساحر پليجو عورتن لاءِ ننڍا ننڍا ڪاروبار، الطاف خاصخيلي، بنيادي مسئلن جي حل لاءِ ڪردار، ايڊووڪيٽ منور جتوئي سماجي تبديلي ۾ علم ۽ ادب جو ڪردار جي موضوع تي ليڪچر ڏنا. ليڪچر پروگرام ۾ 150 کان وڌيڪ شاگردياڻين شرڪت ڪئي. اياز لطيف پليجي نياڻين جي تعليم تي زور ڏيندي چيو تہ اسين تعليم کانسواءِ ترقي حاصل نٿا ڪري سگھون. بنيادي انساني حق تعليم سان جڙيل آھن. اياز لطيف پليجي چيو تہ جاگيرداراڻي سماج ۾ عورتن کي پنهنجي حقن بابت ڪا ڄاڻ ئي ناهي، نہ ئي ان کي ڪا ڄاڻ ڏني وڃي ٿي، عورت اڄڪلھ جي جديد دور ۾ بہ غلامي واري زندگي گذاري ٿي، سنڌ جي ٻهراڙي توڙي شهرن ۾ عورتن سان اڻ برابري وارو رويو رکيو وڃي ٿو، اسان جي سماج جي بيحسي ايتري آھي جو عورت رڳو گهر ۽ ماني پچائڻ تائين محدود ٿي رهي آهي، عورت جو مقدر ڌڪا کائڻ ناهي. عورتن کي برابري واري حق کانسواء ڪو بہ سماج اڳتي نٿو وڌي سگھي۔ سياست سان گڏ زندگي جي ھر شعبي ۾ جيستائين عورتن جو ڪردار شامل نہ ھوندو ڪاميابيون ممڪن ناھن۔ اياز لطيف پليجي چيو تہ سنڌ ۾ عورتن ۽ شاگردياڻين جي حقيقي درد جو درمان سنڌياڻي تحريڪ ۽ سنڌي گرلس اسٽونڊٽس تحريڪ آهي، سنڌياڻي تحريڪ ۽ سنڌي گرلس اسٽونڊٽس تحريڪ کان سواءِ سنڌ ۾ ٻئي ڪھڙي عورت تنظيم يا تحريڪ آهي جيڪا ٻارنهن ئي مھينا رستن تي سنڌ ۽ سنڌي ماڻهن جي حقن لاءِ احتجاج ڪندي آهي، ڪالاباغ ڊيم، مھاجر صوبي، دھشتگردي ۽ ٻين سنڌ ۽ ملڪ دشمن منصوبن خلاف سنڌي گرلس اسٽوڊنٽس تحريڪ ۽ سنڌياڻي تحريڪ جي اڳواڻي واري ڪردار سان شاندار ڪاميابيون حاصل ڪيون۔