گهگهر ۾ جيئي سنڌ محاذ طرفان امداد زهراڻي جي وڇوڙي تي تعزيتي پروگرام منعقد

امداد زهراڻي جهڙا مخلص ۽ ڪميٽيڊ ڪارڪن ورلي پيدا ٿيندا آهن: خالق جوڻيجو

ملير (عبدالرشيد مورجھريو) گهگهر ۾ جيئي سنڌ محاذ طرفان سينيئر قومي ڪارڪن ۽ مرڪزي اڳواڻ امداد زهراڻي جي وڇوڙي تي تعزيتي پروگرام منعقد ڪيو ويو، جنهن ۾ پارٽي اڳواڻن، ڪارڪنن، علائقي واسين ۽ مرحوم جي وارثن وڏي انگ ۾ شرڪت ڪئي، تقريب ۾ جيئي سنڌ محاذ جي چيئرمين خالق جوڻيجو، جنرل سيڪريٽري امداد چاچڙ، خالد جوڻيجو، محمد مٺل، شبير حسين چاچڙ، محمد اسماعيل سومرو، عورت اڳواڻ سلما جوڻيجو، اعظم زھراڻي، مرحوم جي فرزندن رسول بخش، غلام مرتضيٰ، علي نواز، عامر زهراڻي سميت ٻين اڳواڻن شرڪت ڪئي ان موقعي تي خطاب ڪندي خالق جوڻيجو چيو ته امداد زهراڻي جهڙا مخلص ۽ ڪميٽيڊ ڪارڪن ورلي پيدا ٿيندا آهن، هن هميشه تنظيم ۽ ان جي مقصدن کي اوليت ڏني ۽ ڪڏهن به تنظيمي فيصلن کان انحراف نه ڪيو. هن وڌيڪ چيو ته مرحوم انتهائي سادي، ٻاجهاري ۽ مهمان نواز طبيعت جو مالڪ هو، جنهن جي سوچ ۽ عمل ۾ هڪجهڙائي هئي. هن پنهنجي گهر ۾ به ڄڻ ته هڪ ننڍڙو تنظيمي يونٽ قائم ڪري رکيو هو، ڇاڪاڻ ته کيس يقين هو ته سماجي مسئلن جو حل سياست ذريعي ئي ممڪن آهي. خالق جوڻيجو چيو ته سنڌ هن وقت ڏکين حالتن مان گذري رهي آهي، سڃاڻپ، وسيلا ۽ ڌرتي کي سنگين چيلينجز درپيش آهن، اهڙي دور ۾ امداد زهراڻي جهڙن ڪارڪنن جي وڌيڪ ضرورت آهي. هن چيو ته مرحوم پورهيت طبقي سان واسطو رکندي به سياست ۽ ادب تي گهري نظر رکندو هو ۽ شاهه عبداللطيف ڀٽائي جي شاعري جي بهترين تشريح ڪندو هو. تقريب ۾ اڳواڻن چيو ته امداد زهراڻي جو وڇوڙو هڪ وڏو نقصان آهي، جنهن سان تنظيم ۾ خال پيدا ٿيو آهي، جنهن جو پورائو ڏکيو آهي. هنن چيو ته سچي قومي ڪارڪن جي سڃاڻپ اها هوندي آهي ته هو ذاتي مفادن تي قومي مفاد کي ترجيح ڏئي، ۽ اها خوبي مرحوم ۾ نمايان هئي. هنن چيو ته سنڌ جي آجپي جي جدوجهد ۾ جيتري تائين عورتون حصو نٿيون ڳنڍين اوتري تائين نتيجا حاصل نه ڪري سگهبا، پروگرام ۾ امداد زهراڻي جي خدمتن کي ڀرپور لفظن ۾ خراج عقيدت پيش ڪيو ويو.