نوشهروفيروز ۾ 8ڏينهن کان بجلي بحال نه ٿيڻ خلاف احتجاجي مظاهرو

علائقي واسين بجلي بندش خلاف، مبينا ڪنڊا سسٽم ۽ سڙيل ٽرانسفارمر تبديل نه ڪرڻ خلاف احتجاج ڪيو

نوشهروفيروز(ڊ ر)اٺن ڏينهن کان بجلي بحال نه ٿيڻ خلاف احتجاج، سيپڪو آفيسرن خلاف سخت نعريبازي خبر موجب ريلوي اسٽيشن ڪالوني ۽ ڀرپاسي وارن علائقن جي رهواسين اٺن ڏينهن کان بجلي فراهم نه ٿيڻ، مبينا ڪنڊا سسٽم ۽ سڙيل ٽرانسفارمر تبديل نه ڪرڻ خلاف احتجاجي مظاهرو ڪري سيپڪو آفيسرن خلاف سخت نعريبازي ڪئي مظاهرين جو چوڻ هو ته وفاقي حڪومت پاران عيد جي موڪلن دوران لوڊشيڊنگ نه ڪرڻ جا اعلان ۽ سنڌ هاءِ ڪورٽ پاران سڙيل ٽرانسفارمر فوري طور تبديل ڪرڻ جا حڪم مسلسل نظرانداز ڪيا پيا وڃن، جڏهن ته سندن علائقو گذريل اٺن ڏينهن کان بجلي کان محروم آهي۔ احتجاج ڪندڙن الزام هنيو ته جيڪي صارف بجلي جا بل ادا نٿا ڪن، تن کي ٽن ٽن ٽرانسفارمرن ذريعي بجلي فراهم ڪئي پئي وڃي، جڏهن ته باقاعدگي سان بل ادا ڪندڙ صارف سخت گرمي ۾ اذيت ڀوڳڻ تي مجبور آهن۔ ان موقعي تي شڪيل راڄپر، مختيار ڪلهوڙو، راحيل احمد ۽ گلاب خان چيو ته فوري طور بجلي بحال ڪري شهرين ۽ صارفين کي جيئڻ جو حق ڏنو وڃي۔ هنن چيو ته سيپڪو انتظاميا جي نااهلي سبب عام ماڻهو سخت مشڪلاتن کي منهن ڏئي رهيا آهن۔ مظاهرين خبردار ڪيو ته جيڪڏهن فوري طور بجلي بحال نه ڪئي وئي ته هو سڀاڻي سيپڪو آفيسرن جا پتلا ساڙي احتجاج جو دائرو وڌيڪ وسيع ڪندا۔ هنن وفاقي حڪومت، سيپڪو چيف ۽ ٻين اعليٰ اختيارين کان مطالبو ڪيو ته صارف دشمن رويو رکندڙ سيپڪو آفيسرن خلاف ڪارروائي ڪئي وڃي ۽ متاثر علائقن ۾ فوري طور بجلي بحال ڪئي وڃي۔ مظاهرين ٻڌايو ته هنن سيپڪو آفيسرن خلاف پنهنجي شڪايتن ۽ مطالبن بابت اعليٰ اختيارين ڏانهن ٽيليگرام ۽ درخواستون پڻ موڪلي ڇڏيون آهن ته جيئن سندن مسئلن جو ترت حل ڪڍيو وڃي۔