ملير: چوڪنڊي قبرستان لڳ قائم قديم وسندي دائود شورو ڳوٺ بنيادي سهولتن کان محروم

صفائي نه ٿيڻ ڪري ڳوٺ جي مختلف پاڙن ۾ ڪچري جا ڍير لڳل

ملير (رپورٽ: عبدالرشيد مورجھريو) چوڪنڊي قبرستان لڳ قائم قديم وسندي دائود شورو ڳوٺ ۾ بنيادي سهولتن جي شديد کوٽ سبب ڳوٺاڻن ۾ سخت بيچيني پکڙجي وئي آهي مهينن کان صفائي سٿرائي نه ٿيڻ ڪري ڳوٺ جي مختلف پاڙن ۾ ڪچري جا ڍير لڳل آهن، جڏهن ته سيوريج جو نظام ناڪاره ٿيڻ سبب مک رستا ۽ گهٽيون گٽر جي گندي پاڻي هيٺ اچي ويون آهن ڳوٺاڻن نظر بروهي، آڪاش کٽي،ڪبير بلوچ، غلام نبي شورو، الهڏنو شاهه محمد خان ٻرڙو، مختيار سومرو محمود مري ۽ ٻين صحافين سان ڳالهائيندي چيو ته تاريخي چوڪنڊي قبرستان جي ڀرسان قائم دائود شورو ڳوٺ ڪيترن ئي بنيادي مسئلن کي منهن ڏئي رهيو آهي. هنن ٻڌايو ته ڳوٺ جي پرائمري اسڪول جي عمارت جو تعميراتي ڪم ڊگهي عرصي کان رولڙي جو شڪار آهي ۽ ٺيڪيدار ڪم اڌ ۾ ڇڏي غائب ٿي ويو آهي، جنهن سبب سوين ٻارڙا تعليم جهڙي بنيادي حق کان محروم آهن هنن چيو ته سيوريج اسڪيم تي لکين رپيا خرچ ٿيڻ باوجود غلط رٿابندي جي ڪري ڄاڻايل اسڪيم ناڪاره بڻجي وئي آهي جنھن سبب ڳوٺ۾ داخل ٿيندڙ مک رستا، جن ۾ قبرستان روڊ به شامل آهي، گندي پاڻي ۾ ٻڏل آهن ان صورتحال سبب نه رڳو ڳوٺاڻا پر چوڪنڊي قبرستان ڏسڻ لاءِ ايندڙ سياح پڻ سخت تڪليفن کي منهن ڏئي رهيا آهن ڳوٺاڻن الزام هنيو ته ٽائون ابراهيم حيدري ۽ يوسي چوڪنڊي انتظاميا وٽ عوامي بجيٽ جا اربين رپيا موجود هجڻ باوجود علائقي جا بنيادي مسئلا حل نه پياڪيا وڃن جڏهن ته انتظاميا فقط فوٽو شوٽ تائين محدود آهي هنن سنڌ جي وڏي وزير، مڪاني کاتي ۽ تعليم کاتي، سياحت کاتي جي صوبائي وزيرن، علائقي جي ايم پي اي، ايم اين اي، ٽائون ابراهيم حيدري ۽ يوسي چوڪنڊي جي انتظاميا کان مطالبو ڪيو ته دائود شورو ڳوٺ جا بنيادي مسئلا خصوصن اسڪول جي عمارت جو اڏاوتي ڪم مڪمل ڪرڻ سان گڏوگڏ فوري طور رهواسين کي بنيادي سهولتون فراهم ڪيون وڃن، ٻي صورت ۾ قومي شاهراهه تي ڌرڻو هڻي سخت احتجاج ڪيو ويندو.