درياخان مري ۾ صحافين تي مبينا تشدد خلاف نوشهروفيروز ۾ احتجاج

صحافي برادري، سول سوسائٽي ۽ سماجي تنظيمن جي ڪارڪنن پاران احتجاج ڪيو ويو

نوشهروفيروز (ڊ ر)گذريل رات درياخان مري ۾ صحافين تي ٿيل مبينا تشدد خلاف نوشهروفيروز ۾ صحافي برادري، سول سوسائٽي ۽ سماجي تنظيمن جي ڪارڪنن سخت احتجاج ڪيو۔ ان سلسلي ۾ انصاف چوڪ کان پريس ڪلب تائين احتجاجي ريلي ڪڍي وئي، جنهن ۾ وڏي انگ ۾ صحافين ۽ شهرين شرڪت ڪئي۔ ريلي جي قيادت پريس ڪلب نوشهروفيروز جي صدر محمد يونس راڄپر, جنرل سيڪريٽري علي نواز سولنگي، ڪشن راجا، عطا حسين سمون، عادل عباسي، نويد تڳر، فقير ميهر بهڻ، زاهد لنڊ ۽ سيد مدد علي شاهه سميت ٻيا ڪري رهيا هئا۔ ان موقعي تي اڳواڻن خطاب ڪندي چيو ته صحافين تي تشدد آزادي صحافت تي سڌو حملو آهي، جنهن کي ڪنهن به صورت ۾ برداشت نه ڪيو ويندو۔ هنن الزام هنيو ته صحافين تي تشدد پوليس جي موجودگي ۾ ڪيو ويو، پر جوابدارن خلاف ڪا به ڪارروائي نه ڪئي وئي۔ پريس ڪلب جي صدر محمد يونس راڄپر مطالبو ڪيو ته تشدد ۾ ملوث غنڊه عنصرن خلاف فوري طور ڪيس داخل ڪري کين گرفتار ڪيو وڃي۔ اڳواڻن خبردار ڪندي چيو ته جيڪڏهن جلد جوابدارن کي گرفتار نه ڪيو ويو ته صحافي برادري ايس ايس پي آفيس آڏو ڌرڻو هڻڻ تي مجبور ٿيندي۔