ٺٽو ۾ مبينا مقابلو، نوجوان جي گرفتاري تي سوال، وڪيلن جو مفت قانوني سهڪار جو اعلان

ٺٽو( شفيق ڀٽي)ٺٽو ۾ مبينا جعلي پوليس مقابلو، 16 ورهين جي نوجوان جي گرفتاري تي سوال، وڪيلن جو مفت قانوني سهڪار جو اعلان، شهر ۾ مبينا جعلي پوليس مقابلي ۽ هڪ ننڍي عمر جي نوجوان جي گرفتاري واري معاملي سنجيده سوال اڀاري ڇڏيا آهن۔ ذريعن موجب 12 فيبروري تي ٺٽو پوليس پاران اوجڙي مسجد ڀرسان هڪ مقابلو ظاهر ڪيو ويو، جنهن ۾ دعويٰ ڪئي وئي ته جوابدارن پوليس تي فائرنگ ڪئي ۽ فرار ٿي ويا۔ جڏهن ته مقامي ماڻهن جو چوڻ آهي ته ڄاڻايل هنڌ اهڙي سڙڪ تي واقع آهي جتان فرار ٿيڻ ممڪن ناهي، جنهن ڪري شڪ شبها جنم وٺي رهيا آهن۔ پوليس طرفان هڪ جوابدار شهزاد ولد هاشم کي مفرور ظاهر ڪيو ويو هو۔ متاثر خاندان جو الزام آهي ته گذريل رات لڳ ڀڳ ٻه وڳي پوليس جي ڪيترين ئي موبائلن ۽ موٽر سائيڪلن تي مشتمل نفري شهزاد ولد ظفر جي گهر ۾ داخل ٿي، جتان مبينا طور سون، موبائل فون ۽ ٻيو سامان کڻي ويو ۽ 16 ورهين جي شهزاد کي حراست ۾ ورتو ويو۔ اهل خانہ موجب صبح شهزاد کي عدالت ۾ پيش ڪيو ويو ۽ کيس مبينا پوليس مقابلي ۾ ملوث ظاهر ڪيو ويو۔ علائقي واسين جو چوڻ آهي ته هڪ ننڍي عمر جي نوجوان تي ٻه ڀيرا مقابلي جو الزام هڻڻ ڪيترن ئي سوالن کي جنم ڏئي ٿو۔ ذريعن موجب ڪيس معروف وڪيل جماني وٽ آهي، جڏهن ته ڪيترن ئي وڪيلن هن ڪيس ۾ مفت پيروي ڪرڻ جي پيشڪش پڻ ڪئي آهي۔ شهري حلقن جو چوڻ آهي ته هو عدالتي ڪارروائي ذريعي شفاف جاچ ۽ انصاف جا منتظر آهن۔ ٻئي پاسي پوليس اختيارين جو موقف معلوم ڪرڻ جي ڪوشش ڪئي پئي وڃي ته جيئن معاملي جي مڪمل تصوير سامهون اچي سگهي۔ شهرين مطالبو ڪيو آهي ته واقعي جي غير جانبدارانه جاچ ڪرائي وڃي ته جيئن حقيقتون سامهون اچي سگهن ۽ انصاف کي يقيني بڻايو وڃي۔