ڏوڪري ۾ ينگ ايجوڪيشنل سوسائٽي جي اطهر ميمڻ جي صدارت هيٺ گڏجاڻي

گڏجاڻي ۾ عيسيٰ ميمڻ، علي بخش پٺاڻ، آڪاش قاضي، زاهد ڪلهوڙو ۽ محمد علي ميمڻ ۽ ٻيا شريڪ

ڏوڪري(اطهر ميمڻ) ينگ ايجوڪيشنل سوسائٽي ڏوڪري جي اهم گڏجاڻي اطهر ميمڻ جي صدارت هيٺ منعقد ٿي، جنهن ۾ عيسيٰ ميمڻ، علي بخش پٺاڻ، آڪاش قاضي، زاهد ڪلهوڙو ۽ محمد علي ميمڻ سميت ٻين ميمبرن ڀرپور شرڪت ڪئي، جڏهن ته اجلاس جي ڪارروائي سيڪريٽري نثار جتوئي هلائي. گڏجاڻي دوران 26 اپريل 2026ع، آچر ڏينهن تي ڏوڪري ۾ “هڪ ڏينهون تعليمي سيمينار” منعقد ڪرڻ جو اعلان ڪيو ويو، جنهن ۾ ڊاڪٽر سڪندر مغل، ڊاڪٽر ذوالفقار راھوجو، ڊاڪٽر قاسم سوڍر، ڊاڪٽر عيسيٰ ميمڻ ۽ جنيد احمد ڏھر ڌار ڌار تعليمي ۽ علمي موضوعن تي ليڪچر ڏيندا. ان سلسلي ۾ پروگرام جي تيارين ۽ انتظامي معاملن جو تفصيلي جائزو پڻ ورتو ويو. سيمينار کي ڪامياب بڻائڻ لاءِ مختلف ذميواريون ورهائيندي دعوت ناما ڏيڻ، تعليمي، سماجي ۽ ادبي تنظيمن سان رابطا ڪرڻ ۽ معزز شخصيتن سان ملاقاتن لاءِ الڳ الڳ ڪاميٽيون پڻ جوڙيون ويون. ان موقعي تي صدارتي خطاب ڪندي اطهر ميمڻ چيو ته رٿيل تعليمي سيمينار ڏوڪري جي تاريخ ۾ هڪ يادگار حيثيت اختيار ڪندو. هن چيو ته ينگ ايجوڪيشنل سوسائٽي 2003ع کان وٺي تعليم جي واڌاري لاءِ مسلسل سرگرم عمل آهي ۽ پنهنجي مدد پاڻ تحت ڪيترائي ڪامياب ۽ يادگار پروگرام منعقد ڪرائيندي رهي آهي. گڏجاڻي ۾ ان عزم جو اظهار ڪيو ويو ته سيمينار کي هر حوالي سان ڪامياب بڻائي تعليم جي ميدان ۾ مثبت تبديلي آڻڻ لاءِ گڏيل ڪوششون جاري رکيون وينديون.