ملير ۾ جيالن پاران نوڪرين ۾ پهنجا نوازي خلاف احتجاجي مظاهرو

مقصود گبول، اميد علي گبول ۽ ستار ڪلمتي جي اڳواڻي ۾ احتجاجي مظاهرو ڪيو ويو

ملير (رپورٽ: عبدالرشيد مورجھريو) پيپلز پارٽي جي ڪارڪنن ۽ بيروزگار تعليم يافته نوجوانن مقصود گبول، اميد علي گبول ۽ ستار ڪلمتي جي اڳواڻي عوامي پريس ڪلب ملير اڳيان سرڪاري نوڪرين ۾ مبينا اقرباپروري خلاف احتجاجي مظاهرو ڪيو. مظاهرين جي هٿن ۾ بينر ۽ پلي ڪارڊ هئا، جن تي “نوڪرين ۾ انصاف ڪيو”، “بيروزگارن کي روزگار ڏيو” ۽ “سفارشي ڀرتيون نامنظور” جهڙا نعرا لکيل هئا.مظاهرين سخت نعريبازي ڪندي الزام هنيو ته هميشه وانگر پيپلز پارٽي جي مقامي اڳواڻن ڪارڪنن ۽ جيالن کي نظرانداز ڪري وڏيرن، جاگيردارن ۽ من پسند ماڻهن کي نوڪريون ڏنيون آهن. مظاهرين چيو ته چونڊن دوران ايم اين اي ۽ ايم پي اي روزگار ڏيڻ جا واعدا ڪندا آهن، پر پوءِ پنهنجن واعدن تان ڦري ويندا آهن.احتجاج دوران مظاهرين ملير جي پارٽي قيادت خلاف به سخت نعريبازي ڪئي ۽ مبينا طور نوڪرين ۾ ناانصافي جا الزام لڳايا، گڏوگڏ انهن جي پاليسين کي رد ڪري ڇڏيو.مظاهرين وڌيڪ چيو ته غريب عوام پيپلز پارٽي کان اميد رکي ٿو ته کين روزگار ملندو، پر مبينا طور تي نوڪريون پيسن عيوض ۽ من پسند ماڻهن کي ڏنيون پيون وڃن، جيڪو بيروزگار نوجوانن سان سراسر ناانصافي آهي.احتجاج ڪندڙن پارٽي قيادت بلاول ڀٽو زرداري، سيد مراد علي شاهه ۽ فريال ٽالپر کان مطالبو ڪيو ته معاملي جو فوري نوٽيس وٺي مبينا ڪرپشن ۽ غير شفاف ڀرتين جي جاچ ڪرائي وڃي.مظاهرين خبردار ڪيو ته جيڪڏهن بيروزگار نوجوانن کي سندن حق نه ڏنو ويو ته احتجاج جو دائرو وڌيڪ وڌايو ويندو۔