ايڊيشنل ڊپٽي ڪمشنر (ون) عمران الحق جي صدارت هيٺ اهم اجلاس منعقد

اسسٽنٽ ڪمشنرز، لاڳاپيل آفيسرن سميت فارم هائوسز، شاپنگ مالز مالڪن جي به شرڪت

ٺٽو(شفيق ڀٽي) ڊپٽي ڪمشنر ٺٽو سرمد علي ڀاڳت جي هدايتن تي ايڊيشنل ڊپٽي ڪمشنر (ون) عمران الحق جي صدارت هيٺ دربار هال مڪلي ۾ فائر سيفٽي آڊٽ بابت هڪ اهم اجلاس منعقد ٿيو۔ اجلاس ۾ اسسٽنٽ ڪمشنرز، لاڳاپيل آفيسرن سميت ضلعي ڀر جي فارم هائوسز، شاپنگ مالز، هوٽلن، ريسٽورنٽن، واٽر پارڪن ۽ مارڪيٽن جي مالڪن ۽ نمائندن شرڪت ڪئي۔ ان موقعي تي ايڊيشنل ڊپٽي ڪمشنر (ون) عمران الحق چيو ته انساني جاني تحفظ لاءِ فائر سيفٽي قدمن کي هر صورت ۾ يقيني بڻائڻ لازمي آهي۔ هن سڀني لاڳاپيل مالڪن کي هدايت ڪئي ته هو پنهنجي ادارن ۾ فائر فائٽنگ جا اوزار، ايمرجنسي نڪرڻ جا رستا ۽ حفاظتي انتظام فوري طور تي مڪمل ۽ فعال بڻائن۔ هن وڌيڪ چيو ته فائر سيفٽي آڊٽ دوران ڪنهن به قسم جي لاپرواهي يا ڪوتاهي برداشت نه ڪئي ويندي ۽ ڀڃڪڙي ڪندڙن خلاف قانوني ڪارروائي ڪئي ويندي۔ اجلاس ۾ لاڳاپيل آفيسرن فائر سيفٽي بابت بريفنگ پڻ ڏني ۽ شرڪت ڪندڙن کي ضروري هدايتون فراهم ڪيون ويون۔ ايڊيشنل ڊپٽي ڪمشنر (ون) اسسٽنٽ ڪمشنرز ۽ ٻين لاڳاپيل آفيسرن کي هدايت ڪئي ته هو پنهنجي علائقن ۾ موجود فارم هائوسز، واٽر پارڪس، هوٽلز، ريسٽورنٽس، شاپنگ مالز ۽ مارڪيٽن جو دورو ڪري فائر سيفٽي آڊٽ جي عمل کي هر صورت ۾ يقيني بڻائن۔ آخر ۾ ايڊيشنل ڊپٽي ڪمشنر ان عزم جو اظهار ڪيو ته ضلعي ڀر ۾ فائر سيفٽي جو موثر نظام يقيني بڻائڻ لاءِ قدم جاري رکيا ويندا ته جيئن ڪنهن به هنگامي صورتحال کي بروقت منهن ڏئي سگهجي۔