ابراهيم حيدري جو لاشاري ڳوٺ گندگي جي ور چڙهيل, انتظاميه ننڊ سُتل

ڳوٺ ۾ گندگي سبب مڇرن جو آزار وڌي ويو، رهواسي پريشان

ملير (رپورٽ: عبدالرشيد مورجھريو)ابراهيم حيدري ٽائون جي حد لاشاري ڳوٺ ۾ صفائي جي خراب صورتحال سبب علائقي واسين کي سخت مشڪلاتن کي منهن ڏيڻو پئجي رهيو آهي، جڏهن ته پاڪستان پيپلز پارٽي وارڊ 4 جي جنرل سيڪريٽري عاقب لاشاري ٽائون انتظاميا کان فوري قدم کڻڻ جو مطالبو ڪيو آهي۔ عاقب لاشاري موجب لاشاري ڳوٺ ۾ هنڌ هنڌ تي گندگي ۽ ڪچري جا ڍير لڳل آهن، جنهن سبب علائقي ۾ سخت بدبوءِ پکڙجي وئي آهي، جڏهن ته مڇرن جي وڌندڙ تعداد علائقي واسين جي زندگي اجيرن بڻائي ڇڏي آهي۔ هن چيو ته ٽائون جون صفائي واريون گاڏيون علائقي ۾ اچن ٿيون، پر مڪمل صفائي ڪرڻ بدران اڌ ڪچرو کڻي باقي ڇڏي وڃن ٿيون، جنهن سبب صورتحال وڌيڪ خراب ٿي رهي آهي۔هن وڌيڪ چيو ته گندگي سبب ٻارن، عورتن ۽ بزرگن کي سخت تڪليفن کي منهن ڏيڻو پئجي رهيو آهي، جڏهن ته مختلف بيمارين پکڙجڻ جو خدشو پڻ وڌي ويو آهي۔ علائقي واسين ڪيترائي ڀيرا لاڳاپيل اختيارين کي شڪايتون پڻ ڪرايون آهن، پر اڃا تائين مسئلو حل نه ٿي سگهيو آهي۔پيپلز پارٽي اڳواڻ عاقب لاشاري نظير ڀٽو چيئرمين ابراهيم حيدري ٽائون ۽ مشتاق مٽو کان اپيل ڪئي آهي ته فوري طور تي اضافي صفائي عملو ۽ گاڏيون موڪليون وڃن ته جيئن علائقي کي ڪچري مان پاڪ ڪيو وڃي۔هن خبردار ڪيو ته جيڪڏهن جلد صفائي جو عمل شروع نه ڪيو ويو ته علائقي جا ماڻهو احتجاج ڪرڻ تي مجبور ٿي ويندا۔ علائقي واسين پڻ ٽائون انتظاميا کان مطالبو ڪيو آهي ته لاشاري ڳوٺ ۾ مستقل بنيادن تي صفائي جو نظام بهتر بڻايو وڃي ته جيئن عوام کي هن تڪليف ڏيندڙ صورتحال مان نجات ملي سگهي۔