ابراهيم حيدري ۽ ڪورنگي فش هاربر ويجهو 2 حادثا، نينگر سميت 2 ڄڻا فوت، ڊرائيور گرفتار

ملير (رپورٽ: عبدالرشيد مورجھريو) ملير جي علائقي ابراهيم حيدري ۽ ڪورنگي فش هاربر ويجهو پيش آيل ٻن ڌار ڌار ٽريفڪ حادثن ۾ 11 ورهين جو ٻار ۽ 40 ورهين جو شخص فوت ٿي ويا، جڏهن ته ٻنهي واقعن ۾ ملوث ڊرائيورن کي گرفتار ڪيو ويو آهي۔پهرين افسوسناڪ حادثو ابراهيم حيدري روڊ تي پيش آيو، جتي تيز رفتار مزدا ٽرڪ جي ٽڪر ۾ 11 ورهين جو معصوم ٻار عبدالمصور ولد محبوب احمد فوت ٿي ويو۔ پوليس موجب ٻار روڊ تي موجود هو ته مزدا ٽرڪ کيس ڇيڀاٽي ڇڏيو، جنهن سبب هو موقعي تي ئي فوت ٿي ويو۔ اطلاع ملڻ تي ايس ايڇ او ابراهيم حيدري غوث بخش اعوان پوليس نفري سان گڏ فوري طور تي واقعي واري هنڌ پهچي ويو ۽ ڪارروائي ڪندي ٽرڪ ڊرائيور کي گرفتار ڪري گاڏي پنهنجي تحويل ۾ وٺي ڇڏي۔ بعد ۾ ٻار جو لاش قانوني ڪارروائي لاءِ جناح اسپتال منتقل ڪيو ويو۔ٻيو حادثو ڪورنگي فش هاربر ويجهو پيش آيو جتي تيز رفتار برف کڻندڙ ٽرڪ جي ٽڪر ۾ 40 ورهين جو عبدالمجيد فوت ٿي ويو، جيڪو چشمه ڳوٺ جو رهواسي هو۔ عيني شاهدن موجب عبدالمجيد روڊ پار ڪري رهيو هو ته فش هاربر مان برف لاٿي واپس ويندڙ ٽرڪ کيس بري طرح ڪچلي ڇڏيو، جنهن سبب هو موقعي تي ئي فوت ٿي ويو۔عيني شاهدن موجب حادثي بعد ٽرڪ ڊرائيور فرار ٿيڻ جي ڪوشش ڪئي، پر موقعي تي موجود مهاڻن ۽ مقامي ماڻهن بروقت ڪارروائي ڪندي ڊرائيور کي پڪڙي پوليس حوالي ڪيو۔ پوليس ملزم ڊرائيور کي حراست ۾ وٺي وڌيڪ جاچ شروع ڪري ڇڏي آهي، جڏهن ته فوتي جو لاش قانوني ڪارروائي لاءِ ويجهي اسپتال منتقل ڪيو ويو۔واقعي بعد علائقي واسين افسوس جو اظهار ڪندي تيز رفتار گاڏين خلاف سخت ڪارروائي ۽ روڊن تي ٽريفڪ ڪنٽرول جا موثر قدم کڻڻ جو مطالبو ڪيو آهي ته جيئن مستقبل ۾ اهڙن حادثن کان بچي سگهجي۔