ميرپورخاص جي نياڻي ڊاڪٽر فهميده لغاري واري واقعي خلاف عمرڪوٽ ۾ احتجاج

تعليمي ادارن ۾ نياڻي کي حراسان ڪندڙن خلاف سخت ڪارروائي جو مطالبو

عمرڪوٽ (رپورٽ:ڪانجي مل رکيسر) ميرپورخاص ۾ پوزيشن هولڊر ميڊيڪل شاگردياڻي ڊاڪٽر فهميده لغاري جي مبينه هراساني ۽ ذهني دٻاءُ سبب پيش آيل افسوسناڪ واقعي خلاف سنڌ يونائيٽڊ پارٽي پاران پريس ڪلب عمرڪوٽ آڏو احتجاجي مظاهرو ڪيو ويو، جتي ڪارڪنن ۽ شهرين وڏي انگ ۾ شرڪت ڪري ذميوارن خلاف سخت ڪاروائي جو مطالبو ڪيو، احتجاجي مظاهري ۾ ضلعي سيڪريٽري سنڌ يونائيٽڊ پارٽي ثناءُ ساند صحافين سان ڳالهائيندي چيو تہ ڊاڪٽر فهميده لغاري جو واقعو صرف هڪ نياڻي جو الميو ناهي، پر اهو پوري سماج جي ضمير کي لوڏي ڇڏيندڙ سانحو آهي، هن چيو تہ تعليمي ادارا، جيڪي علم، شعور ۽ تحفظ جا مرڪز هجڻ گهرجن، اتي جيڪڏهن نياڻيون پاڻ کي غير محفوظ محسوس ڪن ٿيون تہ اهو اسان سڀني لاءِ انتهائي شرمناڪ ڳالهه آهي، هن وڌيڪَ چيو تہ هڪ پوزيشن هولڊر شاگردياڻي جو اهڙي انجام تائين پهچڻ رياستي ادارن ۽ تعليمي نظام لاءِ وڏو سوال آهي، ۽ جيڪڏهن هاڻي به خاموشي اختيار ڪئي وئي تہ اهڙن واقعن ۾ وڌيڪَ اضافو ٿيندو، هن چيو تہ ملوث عنصرن کي بي نقاب ڪري کين قانون جي ڪٽهڙي ۾ آندو وڃي ۽ متاثر خاندان کي انصاف فراهم ڪيو وڃي، ان موقعي تي ايس يو پي اڳواڻ گل بجير صحافين سان ڳالهائيندي چيو ته ھي واقعو انتهائي ڏکوئيندڙ ۽ دل ڏاريندڙ آهي، جتي هڪ ذهين ۽ قابل نياڻي کي مبينه طور هراسان ڪري ذهني طور ٽوڙي وڌو ويو، هن چيو تہ اهو واقعو رڳو هڪ شاگردياڻي سان ناانصافي نه پر پوري تعليمي نظام تي هڪ وڏو سواليا نشان آهي، هن وڌيڪَ چيو تہ جيڪڏهن اهڙن واقعن جي شفاف جاچ نه ڪئي وئي ۽ ذميوارن کي عبرتناڪ سزا نه ڏني وئي تہ معاشري ۾ بيچيني ۽ بي اعتمادي وڌندي، هن حڪومت کان مطالبو ڪيو تہ اعليٰ سطحي جاچ ڪرائي حقيقتون سامهون آنديون وڃن ۽ ڏوهارين کي سخت کان سخت سزا ڏئي مثال قائم ڪيو وڃي، احتجاج ۾ ٻين اڳواڻن سوشل ايڪٽيوسٽ سجاد منڱريو، راجا سوڻيکي، ڪامران آريسر، علي رضا جوکيو سميت ٻين ڳالهائيندي چيو تہ تعليمي ادارن ۾ هراساني جا واقعا هاڻي لڪيل نه رهيا آهن، پر هڪ تلخ حقيقت بڻجي سامهون اچي رهيا آهن، هنن چيو تہ ڪيترائي واقعا بليڪ ميلنگ، دٻاءُ ۽ خوف جي ڪري منظرعام تي نٿا اچن، جنهن سبب متاثر نياڻيون اندروني اذيت جو شڪار ٿين ٿيون، هنن وڌيڪَ چيو تہ اسڪولن، ڪاليجن ۽ يونيورسٽين ۾ ويٺل اهڙا “بدبودار ڪردار” نه رڳو تعليم جهڙي مقدس شعبي کي بدنام ڪري رهيا آهن، پر سڄي سماج لاءِ خطرو بڻجي ويا آهن، جيڪڏهن اهڙن عنصرن کي سندن انجام تائين پهچايو وڃي تہ اهڙا افسوسناڪ واقعا روڪي سگهجن ٿا، مظاهرين چيو تہ هاڻي حالتون اهڙيون ٿي ويون آهن جو والدين پنهنجي نياڻين کي تعليم ڏيارڻ وقت به خوف ۽ بيچيني محسوس ڪن ٿا، جيڪو هڪ انتهائي خطرناڪ سماجي الميو آهي، هنن حڪومت کان مطالبو ڪيو تہ تعليمي ادارن سميت سمورن سرڪاري ۽ خانگي شعبن ۾ هراساني خلاف سخت قانوني ڪاروائي کي يقيني بڻايو وڃي، جيئن مستقبل ۾ ڪنهن به نياڻي سان اهڙو سانحو پيش نه اچي.