ملير ڪورٽ ۾ پيٽرول ۽ ڊيزل جي وڌندڙ قيمتن خلاف قومي لائرس فورم جو احتجاج

ايڊووڪيٽ مقصود سومرو، ايڊووڪيٽ ڪاشف خاصخيلي، ايڊووڪيٽ سجاد لاشاري ۽ ٻين احتجاج ڪيو

ملير (رپورٽ: عبدالرشيد مورجھريو) قومي عوامي تحريڪ جي مرڪزي سڏ تي اڄ قومي لائرس فورم طرفان ملير ڪورٽ ڪراچي ۾ پيٽرول ۽ ڊيزل جي وڌندڙ قيمتن خلاف احتجاجي مظاهرو ڪيو ويو، جنهن ۾ وڪيل برادري وڏي تعداد ۾ شرڪت ڪري حڪومت خلاف سخت نعريبازي ڪئي ۽ مهانگائي خلاف آواز اٿاريو.احتجاج جي اڳواڻي قومي لائرس فورم جي اڳواڻ ايڊووڪيٽ مقصود سومرو ڪئي، جڏهن ته ايڊووڪيٽ ڪاشف خاصخيلي، ايڊووڪيٽ سجاد لاشاري، شوڪت ڀنڊ، مهتاب سومرو، ذيشان گوپانگ، حماد ڀٽو گرديزي سميت ٻين وڪيلن پڻ احتجاج ۾ ڀرپور شرڪت ڪئي.مظاهري دوران وڪيلن هٿن ۾ پلي ڪارڊ ۽ بينر کنيا، جن تي پيٽروليم شين جي قيمتن ۾ واڌ ۽ مهانگائي خلاف نعرا لکيل هئا. مظاهرين حڪومت خلاف سخت نعريبازي ڪندي مطالبو ڪيو ته پيٽرول ۽ ڊيزل جي قيمتن ۾ فوري طور گهٽتائي آندي وڃي، ڇاڪاڻ ته وڌندڙ مهانگائي سبب عام ماڻهو سخت پريشاني کي منهن ڏئي رهيا آهن.ان موقعي تي خطاب ڪندي ايڊووڪيٽ مقصود سومرو چيو ته پيٽروليم شين جي قيمتن ۾ واڌ سبب ٽرانسپورٽ جا ڀاڙا وڌي ويا آهن، جنهن سان گڏ روزمرهه استعمال جون شيون پڻ مهانگيون ٿي ويون آهن، جنهن جو سڌو بار عام عوام تي پئجي رهيو آهي. هن چيو ته حڪومت عوام کي رليف ڏيڻ ۾ ناڪام ٿي وئي آهي ۽ مزدور، پورهيت ۽ وچولي طبقي جي زندگي مشڪل بڻجي وئي آهي.ٻين اڳواڻن خطاب ڪندي چيو ته جيڪڏهن پيٽروليم شين جي قيمتن ۾ واڌ واپس نه ورتي وئي ته احتجاج جو دائرو وڌايو ويندو