نوشهروفيروز ۾ ايس يو پي جي سڏ تي تيل اگهن ۾ واڌ خلاف احتجاجي ريلي

نوشهرو فيروز (ڊر)حڪومت طرفان پيٽرول ۽ ڊيزل جي اگهن ۾ ڪيل واڌ، پيٽروليم ليوي، ڪسٽم ڊيوٽي ۽ ٻين ٽيڪسن جي خاتمي لاءِ سنڌ يونائيٽيڊ پارٽي نوشهرو فيروز طرفان ٺاروشاه اسٽاپ نوشهرو فيروز ۾ احتجاج ڪيو ويو. احتجاج جي اڳواڻي مهر علي وسٽڙو، خادم سيال، ثمر سنڌي۔ عمران کوسو ۽ ٻين اڳواڻن ڪئي. مظاهرين وفاقي حڪومت خلاف سخت نعريبازي ڪئي.ان موقعي تي اڳواڻن چيو ته حڪومت پيٽرول، ڊيزل ۽ ٻين ضروري شين تي ڳرا ٽيڪس لاڳو ڪري اگهن ۾ لڳاتار واڌ ڪري عوام کي سخت پريشانين ۾ مبتلا ڪري ڇڏيو آهي. هنن چيو ته تيل جي اگهن ۾ واڌ سبب مهانگائي ۾ بي پناهه اضافو ٿيو آهي، جنهن ڪري عام ماڻهو جي زندگي ڏکيو بڻجي وئي آهي. اڳواڻن وڌيڪ چيو ته پيٽرول ۽ ڊيزل مهانگا ٿيڻ سان ٽرانسپورٽ جا ڀاڙا، خوراڪ ۽ روزمره استعمال جون شيون مهانگيون ٿي ويون آهن. حڪومت عوام مٿان پيٽرول ۽ ڊيزل جو “مهانگائي بم” اڇلائي ڇڏيو آهي. احتجاج ڪندڙن وفاقي حڪومت کان مطالبو ڪيو ته فوري طور پيٽروليم ليوي، ڪسٽم ڊيوٽي، لينڊ ايڪولائيزيشن ٽيڪس سميت سڀئي اضافي ٽيڪس ختم ڪري اگهن ۾ گهٽتائي آڻي عوام کي رليف فراهم ڪيو وڃي، ٻي صورت ۾ احتجاج جو دائرو وڌيڪ وڌايو ويندو.