عمرڪوٽ ۾ ڳوٺ ھاشم پلي واسين جو احتجاج، اڳوڻو ايم اين اي لال مالهي به شريڪ

استاد عارف پلي جي گهر مان لکين رپين جو ڌاڙو هڻندڙ جوابدارن جي گرفتاري لاءِ احتجاج ڪيو ويو

عمرڪوٽ (رپورٽ:ڪانجي مل رکيسر) عمرڪوٽ ويجهو ڳوٺ حاجي هاشم پلي ۾ ٻه مهينا اڳ رٽائرڊ پرائمري استاد عارف پلي جي گهران لڳل ڌاڙي جي واقعي جا جوابدار گرفتار نه ٿيڻ ۽ مال برآمد نه ٿيڻ خلاف پريس ڪلب عمرڪوٽ آڏو احتجاجي مظاهرو ڪيو ويو، جتي مظاهرين پوليس خلاف سخت نعريبازي ڪئي، مظاهري جي اڳواڻي اڳوڻي پي ٽي آءِ ايم اين اي لال مالهي، ڊسٽرڪٽ بار جي جنرل سيڪريٽري محمد يوسف منڱريو، جڏهن ته جاويد پلي، علي نواز پلي، علي محمد رونجهو، گل بجير ۽ ٻين ڪئي، لال مالهي صحافين سان ڳالهائيندي چيو تہ عمرڪوٽ جهڙي پرامن علائقي ۾ ڌاڙا ۽ چوريون معمول بڻجي ويون آهن، پر افسوس سان چوڻو پوي ٿو تہ پوليس پنهنجي ذميوارين نڀائڻ ۾ مڪمل ناڪام نظر اچي رهي آهي، هن چيو تہ ٻه مهينا گذرڻ باوجود عارف پلي جي گهر تي ٿيل ڌاڙي ۾ ملوث جوابدار گرفتار نه ٿيا آهن، جيڪو پوليس جي ڪارڪردگي تي وڏو سواليا نشان آهي، هن اختيارين کان مطالبو ڪيو تہ فوري طور جوابدارن کي گرفتار ڪري متاثر خاندان کي انصاف فراهم ڪيو وڃي، محمد يوسف منڱريو صحافين سان ڳالهائيندي چيو تہ قانون لاڳو ڪندڙ ادارن جي ڪمزوري سبب ڏوهارين جا حوصلا بلند ٿي رهيا آهن، هن چيو تہ بودر فارم ٿاڻي تي نامعلوم جوابدارن خلاف ڪيس داخل ٿيڻ باوجود ڪا به اڳڀرائي نه ٿيڻ ڳڻتي جوڳي ڳالهه آهي، هن زور ڀريو تہ پوليس فوري ڪارروائي ڪري چوري ڪيل سامان برآمد ڪرائي ۽ ملوث ماڻهن کي قانون جي ڪٽهڙي ۾ آڻي، جڏهن ته ٻين اڳواڻن جاويد پلي، علي نواز پلي، علي محمد رونجهو، گل بجير ۽ ٻين صحافين سان ڳالهائيندي چيو تہ ٻه مهينا اڳ ڳوٺ حاجي هاشم پلي ۾ هٿياربندن ڌاڙو هڻي گهر ۾ موجود سمورو قيمتي سامان کڻي ويا، پر پوليس اڃان تائين ڪا به اثرائتي ڪارروائي نه ڪئي آهي، هنن چيو تہ جوابدار اڄ به آزاد گهمي رهيا آهن ۽ وڌيڪَ وارداتن جو خدشو وڌي ويو آهي، جنهن سبب متاثر خاندان سميت علائقي واسي سخت خوف ۽ بيچيني ۾ مبتلا آهن، هنن وڌيڪَ چيو تہ عمرڪوٽ ۾ وڌندڙ ڏوهن تي پوليس جي خاموشي افسوسناڪ آهي، جيڪڏهن صورتحال تي ضابطو نه آندو ويو تہ علائقي جو امن امان سخت متاثر ٿي سگهي ٿو، مظاهرين آخر ۾ چتاءُ ڏيندي چيو تہ جيڪڏهن جلد جوابدارن کي گرفتار ڪري چوري ٿيل سامان برآمد نه ڪيو ويو تہ پوءِ سخت احتجاجي تحريڪ هلائي ويندي، جنهن جي سموري ذميواري انتظاميه تي هوندي.