ملير: گلشن حديد مان ڇهين درجي جي شاگردياڻي پراسرار نموني گم، وارثن پاران اغوا جو شڪ

ملير (رپورٽ: عبدالرشيد مورجھريو) گلشن حدید مان ڇهين ڪلاس جي 13 ورهين جي شاگردياڻي پراسرار نموني گم ٿيڻ بعد علائقي ۾ خوف ۽ ڳڻتي جي لهر ڇانئجي وئي آهي، جڏهن ته وارثن معصوم نينگري جي اغوا جو شڪ ظاهر ڪندي اعليٰ اختيارين کان فوري نوٽيس وٺي بازيابي جو مطالبو ڪيو آهي۔ گلشن حدید جي رهواسي آغا وحيد پٺاڻ جي 13 ورهين جي ڌيءَ طيبه، جيڪا ڇهين ڪلاس جي شاگردياڻي ٻڌائي پئي وڃي، شام لڳ ڀڳ 7 وڳي گهران ويجهي دڪان تان سامان وٺڻ لاءِ نڪتي پر واپس نه موٽي۔ وارثن ۽ پاڙي وارن نينگري جي ڳولا شروع ڪئي پر ڪٿي به پتو نه پئجي سگهيو۔ نينگري جي گمشدگي بعد وارثن اسٽيل ٽائون ٿاڻي پهچي نامعلوم ماڻهن خلاف ڪيس داخل ڪرايو، جڏهن ته پوليس شڪ جي بنياد تي زيب پٺاڻ کي گرفتار ڪري پڇا ڳاڇا شروع ڪري ڇڏي آهي۔ان موقعي تي نينگري جي والد آغا وحيد پٺاڻ صحافين سان ڳالهائيندي ٻڌايو ته سندس ڌيءَ معمول موجب شام جو دڪان تان چپس وٺڻ لاءِ وئي هئي، پر اڃان تائين واپس نه موٽي آهي۔ هن چيو ته هو هڪ پورهيت ماڻهو آهي ۽ ڪنهن سان به ڪا دشمني ناهي، جنهن سبب کيس خدشو آهي ته سندس معصوم ڌيءَ کي اغوا ڪيو ويو آهي۔ والد وڌيڪ چيو ته گهر ۾ ڪهرام متل آهي ۽ سمورا گهر ڀاتي سخت پريشاني ۾ مبتلا آهن۔ هن سنڌ جي وڏي وزير، آءِ جي سنڌ ۽ ايس ايس پي ملير کان اپيل ڪئي ته معاملي جو فوري نوٽيس وٺي نينگري جي جلد بازيابي کي يقيني بڻايو وڃي۔هوڏانهن پوليس جو چوڻ آهي ته نينگري جي ڳولا لاءِ مختلف هنڌن تي ڇاپا هنيا پيا وڃن ۽ گرفتار ٿيل ڄڻي کان به جاچ جاري آهي، جڏهن ته واقعي جي مختلف رخن کان جاچ ڪئي پئي وڃي۔علائقي واسين پڻ خدشو ظاهر ڪندي مطالبو ڪيو آهي ته نينگري کي جلد کان جلد بازياب ڪرائي وارثن جي بيچيني ختم ڪئي وڃي ۽ واقعي ۾ ملوث عنصرن خلاف سخت قانوني ڪارروائي ڪئي وڃي۔