ملير: مانسهره ڪالوني ۾ گندو پاڻي جمع، رهواسي پريشان

سي ون اسٽاپ 8هزار روڊ تي ڪيتري عرصي کان گندو پاڻي بيٺل

ملير (رپورٽ: عبدالرشيد مورجھريو) ملير ٽائون جي مانسهره ڪالوني C-1 اسٽاپ اٺ هزار روڊ تي ڪيتري عرصي کان پيئڻ جي صاف پاڻي ۽ نيڪال جي گندي پاڻي جمع ٿيڻ سبب علائقي واسين کي سخت تڪليفن کي منهن ڏيڻو پئجي رهيو آهي۔ علائقي واسين موجب برساتي نالي ۽ سيوريج لائين بند هجڻ سبب گندو پاڻي روڊ تي بيهي رهيو آهي، جنهن ڪري نه رڳو آمدرفت متاثر ٿي رهي آهي پر علائقي ۾ بدبوءِ ۽ بيمارين پکڙجڻ جو خطرو پڻ وڌي ويو آهي۔ شهرين جو چوڻ آهي ته روڊ تي پاڻي بيهڻ سبب گاڏين جي اچ وڃ ۾ سخت ڏکيائي پيش اچي رهي آهي، جڏهن ته پيادل هلندڙ ماڻهن کي به سخت پريشاني کي منهن ڏيڻو پئجي رهيو آهي۔رهواسين ٻڌايو ته مانسهره ڪالوني اندر ايندڙ رستو به پاڻي هيٺ اچي ويو آهي، جنهن سبب شاگردن، بزرگن ۽ عورتن کي روزمرهه جي ڪمن ڪارين ۾ ڏکيائين کي منهن ڏيڻو پئجي رهيو آهي۔ علائقي واسين جو چوڻ آهي ته ڪيترائي ڀيرا لاڳاپيل ادارن کي شڪايتون ڪرڻ باوجود مسئلو حل نه ٿي سگهيو آهي۔علائقي واسين حڪومت، واٽر ڪارپوريشن، بلدياتي ادارن ۽ ضلعي انتظاميا کان مطالبو ڪيو آهي ته فوري طور برساتي نالي ۽ سيوريج لائين جي صفائي ڪرائي پاڻي جي نيڪال جو بندوبست ڪيو وڃي