ملير:طوفاني برساتن سبب ديھ الھ ٻنون جا ڳوٺ تباھي جو شڪار

بجلي جا ڪيترا ٿنڀا ڪرڻ سبب هڪ هفتي کان بجلي بند پيل, پاڻي جي کوٽ، مهاڻن کي لکين رپين جو نقصان

ملير(رپورٽ: عبدالرشيد مورجھريو) ڪراچي ڪياماڙي سمنڊ ڪناري آباد ديھ الھ ٻنون ۽ ان جي ڀرپاسي وارن سامونڊي علائقن ۾ تازو پيل تيز طوفاني برساتن ۽ هوائن وڏي پيماني تي تباھي مچائي ڇڏي آهي، جنهن سبب ڪيترن ئي ڳوٺن جو انفرااسٽرڪچر سخت متاثر ٿيو آهي۔مقامي ذريعن موجب، تيز هوائن ۽ برساتن دوران بجلي جا ڪيترائي کنڀا ڪري پيا، جڏهن ته مکيه روڊن تي بجلي جون تارون پکڙجي ويون آهن، جنهن ڪري نه رڳو آمد و رفت متاثر ٿي آهي پر انساني جانين کي به خطرو ٿي ويو آهي۔ خاص طور تي ڳوٺ حاجي نور محمد ڀنڊڳوٺ ۽ الھ بخش ڀنڊڳوٺ گذريل هڪ هفتي کان مڪمل طور تي بجلي کان محروم آهن، جنهن سبب رهواسين کي سخت ڏکائين کي منهن ڏيڻو پئجي رهيو آهي۔ هوڏانهن، سامونڊي ڪناري تي بيٺل ڪيترن ئي مهاڻن جون ٻيڙيون طوفاني لهرن ۽ هوائن سبب پاڻ ۾ ٽڪرائجي تباهه ٿي ويون آهن، جنهن ڪري غريب پورهيت مهاڻن کي لکين روپين جو مالي نقصان برداشت ڪرڻو پيو آهي۔ متاثر مهاڻن جو چوڻ آهي ته سندن روزگار جو واحد ذريعو اهي ٻيڙيون هيون، جيڪي هاڻي ناقابلِ استعمال بڻجي ويون آهن۔ علائقي واسين شڪايت ڪئي آهي ته هن سنگين صورتحال باوجود نه ته ڪي اليڪٽرڪ پاران ڪا فوري ڪارروائي ڪئي وئي آهي ۽ نه ئي چونڊيل نمائندن يا لاڳاپيل ادارن جي ذميوارن علائقي جو دورو ڪيو آهي۔ ان کان علاوه مهاڻن جي تنظيمن طرفان به ڪا خاص مدد يا آواز نه اٿاريو ويو آهي، جنهن سبب متاثر ماڻهو پاڻ کي بي يارو مددگار محسوس ڪري رهيا آهن۔ ڳوٺاڻن جو چوڻ آهي ته مکيه روڊ تي ڪريل بجلي جا کنڀا ۽ تارون حادثن جو سبب بڻجي سگهن ٿيون، تنهنڪري فوري طور تي انهن کي هٽائڻ ۽ بجلي بحال ڪرڻ لاءِ قدم کنيا وڃن۔ هنن حڪومت، ضلعي انتظاميا ۽ فلاحي ادارن کي اپيل ڪئي آهي ته فوري امدادي ڪارروايون ڪري متاثر خاندانن جي مالي مدد ڪئي وڃي ۽ مهاڻن کي سندن روزگار بحال ڪرڻ لاءِ سهائتا فراهم ڪئي وڃي۔