ملير: پير سرهندي ڳوٺ جو گيس ٽن مهينن کان بند، ڳوٺاڻن جو احتجاج

بغير ڪنهن سبب جي ٽن مهينن کان پير سرهندي ڳوٺ جي گيس بند ڪئي وئي آهي، نوٽيس ورتو وڃي: ڳوٺاڻا

ملير (رپورٽ: عبدالرشيد مورجھريو)پير سرهندي ڳوٺ ۾ گذريل ٽن مهينن کان گيس جي بندش خلاف ڳوٺاڻن جو صبر جو بند ڀڄي پيو جنهن بعد سوين مرد، عورتون ۽ ٻارڙا گهرن مان نڪري آيا ۽ رزاق آباد کان ميمڻ ڳوٺ ويندڙ روڊ تي ڌرڻو هڻي روڊ مڪمل طور بلاڪ ڪري ڇڏيو احتجاج سبب روڊ تي گاڏين جون ڊگهيون قطارون لڳي ويون ۽ ٽريفڪ سخت متاثر ٿي ان موقعي تي ڳوٺاڻن وھاب جوکيو، نويد جوکيو ۽ ٻين صحافين سان ڳالهائيندي چيو ته بغير ڪنهن سبب جي ٽن مهينن کان پير سرهندي ڳوٺ جي گيس بند ڪئي وئي آهي، جنهن ڪري روزمرهه زندگي سخت متاثر ٿي رهي آهي ۽ رهواسين کي انتهائي ڏکيائين کي منهن ڏيڻو پئجي رهيو آهي هنن چيو ته گيس بندش بابت سوئي گئس انتظاميا ۽ چونڊيل نمائندن کي ڪيترائي ڀيرا شڪايتون ڏنيون ويون آهن، پر اڃا تائين ڪو به عملي قدم نه کنيو ويو آهي ڳوٺاڻن الزام هنيو ته سوئي گئس ڪمپني جا ڪجهه آفيسر ۽ عملدار گيس چوري ۾ ملوث آهن، جيڪي ڳوٺ ڀرسان قائم ٿيندڙ نئين ڪالونين ۽ خانگي فيڪٽرين کي بغير ميٽر لڳائڻ جي غيرقانوني گيس ڪنيڪشن ڏئي رهيا آهن هنن وڌيڪ چيو ته ڪجهه ڏينهن اڳ ڏيکاءَ لاءِ ڪارروائي ڪئي وئي، پر بعد ۾ ساڳين عملدارن ۽ بااثر ماڻهن جي ملي ڀڳت سان گيس چوري ٻيهر وڏي پيماني تي جاري آهي احتجاج ڪندڙن جو چوڻ هو ته پير سرهندي ڳوٺ جا رهواسي باقاعدگي سان گيس جا بل ادا ڪري رهيا آهن، ان باوجود سندن گيس بند ڪري صبر جو امتحان ورتو پيو وڃي ڳوٺاڻن سوئي گئس انتظاميا، چونڊيل نمائندن ۽ وس وارن کان مطالبو ڪيو ته فوري طور پير سرهندي ڳوٺ جو گيس بحال ڪيو وڃي ۽ رهواسين مان بيچيني ختم ڪئي وڃي، ٻي صورت ۾ رزاق آباد وٽان قومي شاهراه بلاڪ ڪري سخت احتجاج ڪيو ويندو