ٺٽو: حيسڪو عملدارن پاران بجلي جون تارون وڪڻڻ جو انڪشاف، 3 جوابدار سوگها

ٺٽو( شفيق ڀٽي) ايس ايس پي ٺٽو فاروق احمد بجاراڻي جي حڪمن تي ٺٽو پوليس وڏي ڪارروائي ڪندي واپڊا جي سرڪاري تار چوري ۾ ملوث بين الاضلاعي گروهه جي ٽن جوابدارن کي گرفتار ڪري ورتو آهي۔ پوليس موجب ايس ايڇ او ٺٽو انسپيڪٽر زياد حسين نوناري پنهنجي ٽيم سان گڏ خفيه اطلاع تي لنڪ روڊ آگر محلو وٽ ناڪابندي دوران مزدا ٽرڪ نمبر ZNA-212 کي روڪي تلاشي ورتي، جنهن مان واپڊا جي سرڪاري تار جا ڪوائل ۽ 20 سلور پٽيون هٿ ڪيون ويون۔ هٿ آيل سامان جي ماليت هڪ ڪروڙ رپين کان وڌيڪ ٻڌائي پئي وڃي۔ گرفتار ٿيل جوابدارن ۾ شڪيل ولد عبدالغني آرائين (رهواسي حيدرآباد)، محمد اقبال ولد ڪريم بخش نوهاڻي بلوچ ۽ سروان ولد ڌيسار ميگهواڙ (رهواسي ضلع بدين) شامل آهن۔ پوليس موجب شروعاتي جاچ دوران جوابدارن انڪشاف ڪيو آهي ته هو مبينا طور ايس ڊي او واپڊا سليم سومرو، لائن سپرنٽنڊنٽ شهزاد ڀرٽ ۽ پرائيويٽ ٺيڪيدار چوڌري ناصر جي معرفت مڪلي ۾ واقع واپڊا گودام مان تار ڪڍي قاسم بشير نالي ڪٻاڙي کي وڪرو ڪندا هئا، جتان اهو سامان ٻين ضلعن ڏانهن منتقل ڪيو ويندو هو۔ پوليس سرڪاري تار ۽ مزدا ٽرڪ کي تحويل ۾ وٺي ڪيس داخل ڪري ڇڏيو آهي، جڏهن ته وڌيڪ جوابدارن ۽ مبينا سهولتڪارن جي گرفتاري لاءِ ڇاپا جاري آهن ۽ وڌيڪ جاچ عمل هيٺ آهي۔