عمرڪوٽ: ڳوٺ ڍولو ماڇي ۾ اسپارڪ پاران صحت ۽ صفائي بابت آگاهي سيشن

عمرڪوٽ(رپورٽ:ڪانجي مل رکيسر) ڳوٺ ڍولو ماڇي ۾ اسپارڪ تنظيم جي اهتمام هيٺ صحت ۽ صفائي (Health & Hygiene) بابت هڪ اهم آگاهي پروگرام منعقد ڪيو ويو، جنهن جو مقصد ڳوٺاڻن ۾ صاف صفائي، ذاتي صحت ۽ بيمارين کان بچاءَ بابت شعور اجاگر ڪرڻ هو پروگرام دوران اسپارڪ تنظيم جي ماهرن ڊسٽرڪٽ مينيجر سورج مل ۽ سوشل موبلائزرز خديجه بلوچ، حسين ڀٽي ۽ سماجي ڪارڪنن شرڪت ڪندڙن کي صفائي سٿرائي جي اهميت، صاف پاڻي جي استعمال، هٿ ڌوئڻ جي صحيح طريقن، متوازن خوراڪ، ماحولياتي صفائي ۽ عام بيمارين کان بچاءَ بابت تفصيلي ڄاڻ ڏني، خاص طور تي عورتن ۽ ٻارن جي صحت تي زور ڏنو ويو ۽ روزمرهه زندگي ۾ صفائي کي اختيار ڪرڻ بابت عملي صلاحون پڻ ڏنيون ويون، سيشن ۾ ڳوٺ جي عورتن، نوجوانن ۽ بزرگن وڏي انگ ۾ شرڪت ڪئي، شرڪت ڪندڙن سوال جواب جي سيشن دوران پنهنجا مسئلا بيان ڪيا، جن جا ماهرن طرفان تسلي بخش جواب ڏنا ويا، اسپارڪ تنظيم جي نمائندن ان موقعي تي چيو ته صحت مند سماج جي تعمير لاءِ صفائي بنيادي حيثيت رکي ٿي، ۽ اهڙا آگاهي پروگرام مستقبل ۾ به مختلف ڳوٺن ۾ جاري رکيا ويندا، ڳوٺاڻن اسپارڪ تنظيم جي هن ڪوشش کي ساراهيندي اميد ظاهر ڪئي ته اهڙن پروگرامن سان سندن زندگي ۾ مثبت تبديليون اينديون.