ملير ۾ ڌار ڌار ٽريفڪ حادثا، عورت سميت 2ڄڻا فوت، هڪ شخص سخت زخمي

ملير (رپورٽ: عبدالرشيد مورجھريو) گلشن حديد ڀرسان نيشنل هاءِ وي تي ٽريفڪ پوليس چوڪي سامهون تيز رفتار ٽريلر موٽر سائيڪل کي زور دار ٽڪر هنيو، جنهن جي نتيجي ۾ موٽر سائيڪل تي سوار عورت موقعي تي ئي فوت ٿي وئي، جڏهن ته سندس مڙس سخت زخمي ٿي پيو.ريسڪيو ذريعن موجب فوت ٿيل عورت جي سڃاڻپ سميرا بانو زوجه ڪرمت الله، عمر لڳ ڀڳ 30 سال طور ڪئي وئي آهي، جڏهن ته زخمي شخص ڪرمت الله ولد نامعلوم، عمر لڳ ڀڳ 30 سال ٻڌايو وڃي ٿو. ٻئي چليا، ضلع ٺٽو جا رهواسي آهن. اطلاع ملڻ شرط اسٽيل ٽائون پوليس ۽ ريسڪيو ٽيمون موقعي تي پهچي ويون، جن فوت ٿيل عورت جو لاش ۽ زخمي شخص کي جناح اسپتال منتقل ڪيو.ضروري قانوني ڪارروائي بعد فوت ٿيل عورت جو لاش سندس مڙس حوالي ڪيو ويو، جيڪو جسدِ خاڪي کڻي پنهنجي آبائي ڳوٺ روانو ٿي ويو، جڏهن ته واقعي بابت وڌيڪ جاچ جاري آهي۔ٻئي پاسي ملير شاهه لطيف ٽائون سيڪٽر 19/B جي ويجهو نامعلوم گاڏي جي ٽڪر سبب هڪ نوجوان سخت زخمي ٿي پيو، جيڪو اسپتال ويندي دم ڌڻي حوالي ڪري ويو. فوت ٿيل نوجوان جي سڃاڻپ ويني ولد گووندا، عمر تقريباً 22 سال طور ڪئي وئي آهي، جيڪو مقامي رهاڪو هو. حادثي جي اطلاع تي پوليس ۽ ريسڪيو ٽيمون فوري طور موقعي تي پهتيون ۽ زخمي نوجوان کي جناح اسپتال منتقل ڪيو، جتي کيس فوت قرار ڏنو ويو. پوليس واقعي بابت شاهديون گڏ ڪري جاچ شروع ڪري ڇڏي آهي۔