میدان کے اندر بھی، باہر بھی پاکستان کی پہچان بنیں: فیلڈ مارشل عاصم منیر کی انڈر 19 کرکٹ ٹیم کو ہدایت

فیلڈ مارشل عاصم منیر نے ایشیا کپ انڈر 19 جیتنے والی قومی ٹیم کو مبارکباد دیتے ہوئے کھلاڑیوں کو ملک کا سفیر بن کر کردار ادا کرنے کی تلقین کی۔

چیف آف ڈیفنس فورسز اور آرمی چیف فیلڈ مارشل سید عاصم منیر سے جی ایچ کیو میں پاکستان انڈر 19 کرکٹ ٹیم نے ملاقات کی۔ اس موقع پر مسلح افواج کے شعبہ تعلقات عامہ (آئی ایس پی آر) کے مطابق فیلڈ مارشل نے ایشیا کپ انڈر 19 میں شاندار کامیابی پر کھلاڑیوں، ٹیم مینجمنٹ اور آفیشلز کو دل کی گہرائیوں سے مبارکباد دی۔ فیلڈ مارشل عاصم منیر نے ٹیم کے نظم و ضبط، باہمی تعاون اور جرأت مندانہ کھیل کی تعریف کرتے ہوئے کہا کہ یہ کامیابی پوری قوم کے لیے فخر کا باعث ہے۔ انہوں نے کھلاڑیوں پر زور دیا کہ وہ مسلسل اعلیٰ کارکردگی کے لیے محنت جاری رکھیں، پیشہ ورانہ معیار برقرار رکھیں اور میدان کے اندر اور باہر پاکستان کے سفیر بن کر رہیں۔ انہوں نے کہا کہ پاکستان کے نوجوان ہی قوم کے مستقبل کی بنیاد ہیں اور نوجوانوں کی توانائی، صلاحیت اور کردار ملک کی ترقی اور عالمی سطح پر وقار کو مضبوط بناتا ہے۔ آئی ایس پی آر کے مطابق قومی انڈر 19 کرکٹ ٹیم نے حوصلہ افزائی اور سرپرستی پر فیلڈ مارشل عاصم منیر کا شکریہ ادا کیا اور کہا کہ اس اعزاز سے انہیں مزید محنت اور بہتر کارکردگی کے لیے زبردست حوصلہ ملا ہے۔ واضح رہے کہ وزیراعظم شہباز شریف نے بھی انڈر 19 ٹیم کے ہر کھلاڑی کے لیے ایک کروڑ روپے انعام کا اعلان کیا ہے، جسے کھلاڑیوں کی تاریخی کامیابی کا اعتراف قرار دیا جا رہا ہے۔