ڊسٽرڪٽ اليڪشن ڪمشنر ٺٽو سيده حميره بنت معاذ جي صدارت هيٺ اجلاس

ڊسٽرڪٽ ووٽر ايجوڪيشن ڪميٽي جي سهڪار سان ووٽ جي داخلا لاءِ استعمال ٿيندڙ فارم 21 بابت آگاهي ڏني وئي

ٺٽو(محمد شفيق ڀٽي) ڊسٽرڪٽ اليڪشن ڪمشنر ٺٽو سيده حميره بنت معاذ جي زير صدارت ڊسٽرڪٽ ووٽر ايجوڪيشن ڪميٽي جي سهڪار سان ووٽ جي داخلا لاءِ استعمال ٿيندڙ فارم 21 جي سرگرمي بابت شيو مندر ٺٽو ۾ اقليتي برادري لاءِ آگاهي اجلاس منعقد ڪيو ويو. اجلاس جو مقصد اقليتي برادري کي ووٽر لسٽن جي درستگي، نون ووٽرن جي رجسٽريشن، نالن جي اندراج، تصحيح ۽ منتقلي بابت ڄاڻ فراهم ڪرڻ هو. آگاهي اجلاس کي خطاب ڪندي ڊسٽرڪٽ اليڪشن ڪمشنر ٺٽو چيو ته اليڪشن ڪميشن آف پاڪستان شفاف ۽ منصفاڻن چونڊن کي يقيني بڻائڻ لاءِ فارم 21 سرگرمي تحت پوري ملڪ ۾ آگاهي مهم هلائي رهي آهي، جنهن جو مقصد هر شهري کي پنهنجو ووٽ استعمال ڪرڻ جو حق سمجهائڻ ۽ ووٽر لسٽن ۾ ڪنهن به غلطي کي بروقت درست ڪرائڻ آهي. هن چيو ته اقليتي برادري سميت سماج جي هر طبقي جي چونڊ عمل ۾ ڀرپور شرڪت انتهائي ضروري آهي. اجلاس دوران شرڪت ڪندڙن کي فارم 21 جي اهميت، ووٽر لسٽن جي جانچ جو طريقو، نادرا رڪارڊ سان مطابقت، آن لائين ۽ آف لائين درخواستن بابت تفصيلي بريفنگ ڏني وئي. ڊسٽرڪٽ ووٽر ايجوڪيشن ڪميٽي جي ميمبرن اقليتي برادري جي سوالن جا جواب ڏيندي عملي رهنمائي پڻ فراهم ڪئي. اقليتي برادري جي اڳواڻن آگاهي اجلاس کي ساراهيندي چيو ته اهڙيون سرگرميون کين پنهنجن جمهوري حقن کان واقف ڪرائڻ ۾ اهم ڪردار ادا ڪن ٿيون. هنن اميد ظاهر ڪئي ته مستقبل ۾ به اهڙا پروگرام جاري رکيا ويندا ته جيئن وڌيڪ ماڻهن کي ووٽر لسٽن بابت ڄاڻ ملي سگهي. اجلاس ۾ شرڪت ڪندڙن فارم 21 سرگرمي بابت بروشر ۽ معلوماتي مواد حاصل ڪيو، جڏهن ته ڊسٽرڪٽ اليڪشن آفيس پاران تعاون جي خاطري پڻ ڪرائي وئي.