نوشهرو فيروز ۾ نون ڀرتي ٿيل استادن جو ٽريزري آفيس جي گيٽ آڏو احتجاج

ضلع نوشهرو فيروز جي خزاني واري آفيس رشوت جو ڳڙه بڻجي چڪي آھي: استادن جو الزام

نوشهرو فيروز (ڊ ر) ضلعي اڪائونٽس آفيس نوشهروفيروز پاران ڏيڍ سال اڳ ڀرتي ڪيل استادن جا اڪائونٽ نه کولڻ خلاف استادن جي تنظيم پي ٽ الف پاران ٽريزري آفيس جي گيٽ آڏو احتجاجي مظاهرو ڪيو ويو، ان موقعي تي اڳواڻن سيد نذير شاه، آفتاب احمد مورو، عبدالستار پٺاڻ، معشوق وڳڻ ۽ ٻين چيو ته ضلع نوشهرو فيروز جي خزاني واري آفيس رشوت جو ڳڙه بڻجي چڪي آھي رشوت جي رقم نه ملڻ سبب هڪ سال گذرڻ باوجود اين ٽي ايس ٽيسٽ پاس استادن جون پگهارون ادا نه پيون ڪيون وڃن، جن استادن بيزار ٿي رشوت ڏني انهن جون پگهارون جاري ڪيون ويون آهن. باقي ٻين ملازمن کي رلايو پيو وڃي جڏهن ته نوان ڀرٿي ٿيل استاد پنهنجا خرچ ڪري مختلف اسڪولن ۾ ڊيوٽي ڪري رهيا آھن ملازم ڦاڪا ڪشي جو شڪار آهن مظاهرين چيو ته خزاني جي آفيسرن ۾ اشرف آرائين ۽ غفار عباسي رشوت جي بازار گرم ڪري ڇڏي آهي، جيڪو به ملازم خزاني ۾ اچي ٿو اهي آفيسر رشوت کانسواءِ ڪم نٿا ڪن. احتجاج ڪندڙن وڌيڪ چيو ته جيستائين استادن کي پگهارون نه ڏنيون وينديون اسان جو احتجاج جاري رهندو.