قومی سلامتی کے حوالے سے زيرو ٹالرنس پالیسی، خودمختاری کا تحفظ پاک فوج کی اولین ترجیح ہے: فیلڈ مارشل

راولپنڈی (ویب ڈیسک) — چیف آف ڈیفنس اسٹاف فیلڈ مارشل سید عاصم منیر نے کہا ہے کہ قومی سلامتی کے سامنے کسی بھی خطرے کے حوالے سے زيرو ٹالرنس پالیسی اپنائی گئی ہے، اور خودمختاری و علاقائی سالمیت کا تحفظ پاک فوج کا اولین مشن ہے۔ پاک فوج کے ترجمان ادارے آئی ایس پی آر کی جانب سے جاری بیان کے مطابق، فیلڈ مارشل سید عاصم منیر نے لاہور گیرزین کا دورہ کیا، جہاں انہیں آپریشنل تیاریوں کے بارے میں بریفنگ دی گئی۔ آئی ایس پی آر کے مطابق، فیلڈ مارشل نے فارمیشن کی زیر نگرانی ہونے والی تربیتی مشقوں کا جائزہ لیا، مستقبل کی جنگوں کی تیاریوں اور جدید ٹیکنالوجی کے استعمال پر زور دیا اور جوانوں کو فراہم کی جانے والی کھیلوں اور تفریحی سہولیات کو سراہا۔ فیلڈ مارشل نے سی ایم ایچ لاہور میں ہائی کیئر سینٹر کا بھی دورہ کیا اور طبی عملے اور انتظامیہ کی خدمات کی تعریف کی۔ لاہور گیرزین میں افسران سے خطاب کے دوران فیلڈ مارشل نے کہا کہ پاک فوج ہر قسم کے چیلنجز کا سامنا کرنے کے لیے پرعزم ہے، اور قومی سلامتی کے تحفظ، خودمختاری اور علاقائی سالمیت کا تحفظ اس کا اولین مشن ہے۔ انہوں نے مزید کہا کہ پاکستان کی مسلح افواج ملک کی خودمختاری، علاقائی سالمیت اور اندرونی استحکام کے لیے مضبوط عزم رکھتی ہیں، اور اعلیٰ معیار، نظم و ضبط اور بے لوث قومی خدمت پر عمل پیرا ہیں۔ چيف آف ڈیفنس اسٹاف نے کہا کہ پاک فوج جدید ضروریات کے مطابق ہم آہنگ ہونے کی مکمل صلاحیت رکھتی ہے، اور جوانوں کی جسمانی فٹنس اور مورال ہماری اولین ترجیح ہے۔