عمرڪوٽ: پوليو جي ڊسمبر رائونڊ جي پوسٽ ڪيمپين جو جائزو وٺڻ بابت اجلاس

ڊي سي نويد الرحمان اجلاس دوران بهترين ڪارڪردگي تي فيلڊ اسٽاف ۾ سرٽيفڪيٽ ورهايا

عمرڪوٽ (رپورٽ:ڪانجي مل رکيسر) ڊپٽي ڪمشنر نويد الرحمان لاڙڪ جي صدارت هيٺ پوليو جي ڊسمبر رائونڊ جي پوسٽ ڪيمپين جو جائزو وٺڻ بابت اجلاس ڊپٽي ڪمشنر آفيس جي دربار هال ۾ منعقد ٿيو. اجلاس ۾ ايڊيشل ڊپٽي ڪمشنر ٽو عمرڪوٽ عمران آرائين، اسسٽنٽ ڪمشنر عمرڪوٽ رجب علي سٺيو، اسسٽنٽ ڪمشنر سامارو سنجي ڪمار، اسسٽنٽ ڪمشنر ڪنري محمد خان، اسسٽنٽ ڪمشنر پٿورو غلام طارق، ڊي ايڇ او عمرڪوٽ ڊاڪٽر محمد علي، ڊپٽي ڊائريڪٽر لوڪل گورنمينٽ هريش چندر، فوڪل پرسن پوليو ڊاڪٽر وجئہ ڪمار، ڊبليو ايڇ او جي نمائندي ڊاڪٽر درگاشنڪر، ڊسٽرڪٽ مانيٽر ڊاڪٽر انوڌر مهيشوري، صحت کاتي جا آفيسر، پوليو پروگرام جا ڪوآرڊينيٽر، ليڊي هيلٿ سپروائزرز ۽ فيلڊ عملي شرڪت ڪئي.اجلاس دوران ڊپٽي ڪمشنر کي ڊسمبر ۾ هلندڙ پوليو مهم جي ڪارڪردگي، ڪاميابين ۽ درپيش مسئلن بابت بريفنگ ڏني وئي. ٻڌايو ويو تہ ضلعي عمرڪوٽ ۾ مقرر ڪيل هدف موجب پنجن سالن کان گهٽ عمر وارن ٻارن کي پوليو ويڪسين پياري وئي ۽ ٽيمون گهر گهر وڃي ٻارن جي آڱرين تي نشان لڳايا، ڊپٽي ڪمشنر نويد الرحمان لاڙڪ پوليو ٽيمٽ جي محنت کي ساراهيندي چيو تہ پوليو جو مڪمل خاتمو قومي ذميواري آهي. هن وڌيڪ چيو تہ فيلڊ ورڪر فرنٽ لائين هيروز آهن، جيڪي مشڪل حالتن جي باوجود ٻارن جي محفوظ نسل لاءِ ڏينهن رات جدوجهد ڪري رهيا آهن. ھن زور ڏنو تہ ايندڙ مهمن ۾ ڪارڪردگي کي وڌيڪ بهتر بڻايو وڃي ۽ والدين جي خدشن کي خوش اسلوبي سان ختم ڪندي هر ٻار تائين ويڪسين جي پهچ کي يقيني بڻايو وڃي. ان موقعي تي بهترين ڪارڪردگي ڏيکاريندڙ فيلڊ ورڪرن ۽ سپروائزرن ۾ تعريفي سرٽيفڪيٽ پڻ ورهايا ويا. ڊپٽي ڪمشنر ٽيمن جو حوصلو وڌائيندي چيو تہ انهن جي خدمتون ايندڙ نسلن کي معذوري جي خطري کان بچائڻ ۾ اهم ڪردار ادا ڪري رهيون آهن. اجلاس جي آخر ۾ پوليو پروگرام جي ايندڙ حڪمت عملي تي پڻ صلاح مشورا ڪيا ويا. هن چيو تہ سڀني ايريا انچارجن کي پابند ڪيو وڃي تہ هو مائڪرو پلان وڌيڪ بهتر بڻائين ۽ لاڳاپيل کاتن جي وچ ۾ وڌيڪ موثر رابطي تي زور ڏنو ويو.